Last Updated on 27/09/2026 by Monika
Kombëtarja e Republikës së Irlandës do të mbajë shirita të zinj në krah në ndeshjen ndaj Izraelit në Nations League, ndërsa vendimi për zhvillimin e takimit u mor pas orësh diskutimesh dhe një votimi mes lojtarëve.
Ndeshja, e cila zhvillohet të dielën në Hungari, është shoqëruar me polemika të forta për shkak të luftës në Gaza dhe thirrjeve për bojkot. Peticioni “Stop The Game”, i organizuar nga grupi Irish Sport for Palestine, ka mbledhur mbështetje në javët e fundit.
Drejtori ekzekutiv i Federatës Irlandeze të Futbollit (FAI), David Courell, tha se lojtarët do të mbanin shiritat e zinj “në kujtim të të gjitha jetëve të humbura në konflikt”. Ai konfirmoi gjithashtu se shumica dërrmuese e skuadrës kishte votuar në favor të zhvillimit të ndeshjes.
Courell shtoi se disa pjesë të ceremonisë para ndeshjes nuk do të ndiqen nga përfaqësuesit e Republikës së Irlandës.
Federata Izraelite e Futbollit përshëndeti vendimin e FAI-së dhe të kombëtares irlandeze për të zhvilluar ndeshjen, duke deklaruar: “Futbolli ka fituar”. Federata theksoi gjithashtu se, sipas saj, ndarja mes futbollit dhe politikës duhet të ruhet.
Bazunu tërhiqet nga ndeshja
Portieri Gavin Bazunu vendosi të mos luajë ndaj Izraelit, duke thënë se vendimi lidhet me bindjet e tij personale.
Në një postim në Instagram, Bazunu tha se nuk mund të merrte pjesë në ndeshje, pasi beson se vrasja e njerëzve të pafajshëm është e gabuar. Ai theksoi se qëndrimi i tij nuk ishte kundër popullit izraelit apo komunitetit hebre, por kundër asaj që ai e cilësoi si mizori në rajon.
Trajneri i Irlandës, Heimir Hallgrímsson, e përshkroi situatën si një “situatë ku nuk mund të fitosh”, duke pranuar se zhvillimet kishin ndikuar te e gjithë skuadra.
“Askush nuk ndihet rehat për momentin”, tha trajneri islandez, duke shtuar se skuadra po përpiqej të gjente mënyrën më të mirë për të menaxhuar një situatë të pazakontë dhe të ndërlikuar.