Zëdhënës i Rolling Stones i thotë Guardian se banda nuk ka bashkëpunuar me Marc Beckman dhe ekipin e tij për përdorimin e “Gimme Shelter” në dokumentarin për zonjën e parë
Nga Catherine Shoard
Një burim pranë Mick Jagger ka hedhur dyshime mbi pretendimin e producentit të filmit “Melania”, Marc Beckman, se ekipi i tij kishte bashkëpunuar ngushtë me këngëtarin për përdorimin e një kënge të The Rolling Stones në film.
Filmi, i cili ndjek zonjën e parë gjatë 20 ditëve para inaugurimit të dytë të Donald Trump në janar 2025, hapet me një sekuencë në Mar-a-Lago të shoqëruar nga kënga Gimme Shelter. Megjithëse të drejtat e këngës zotërohen nga kompania muzikore ABKCO, Beckman i tha revistës Variety se Jagger “ishte realisht i përfshirë” dhe “na dha bekimin e tij”.
“Ne punuam shumë ngushtë me ta për këtë,” vazhdoi Beckman. “Dhe kjo nuk ishte çështje politike. Me Stones, ata ishin thjesht si: ‘Oh, po bëni një film të bukur.’ Ata arritën ta kapërcenin pengesën. Nuk është politikë – është thjesht historia e një gruaje që nga një qytetare e zakonshme rikthehet në Shtëpinë e Bardhë, dhe filmi duket bukur, Brett [Ratner] po bën një punë të mirë dhe Melania Trump është e fokusuar. Ua shfaqëm dhe u impresionuan.”
Duke folur jozyrtarisht, burimi pranë Jagger tha se duhej treguar skepticizëm, pasi producenti po përpiqej të promovonte filmin. Një zëdhënës i The Rolling Stones i tha gjithashtu Guardian se marrëveshja për përdorimin e “Gimme Shelter” u bë ekskluzivisht mes mbajtësve të të drejtave ABKCO dhe producentëve të “Melania”-s, dhe se banda nuk kishte asnjë përfshirje.
Rolling Stones janë ndër artistët që më parë kanë kundërshtuar përdorimin e këngëve të tyre në tubimet e Donald Trump. Të tjerë përfshijnë Guns N’ Roses. Po ashtu kanë shprehur kundërshtim Grace Jones, trashëgimia e Prince, Neil Young, Bruce Springsteen, Adele, Queen, R.E.M., Elton John, ABBA, Jack White, Celine Dion, Foo Fighters, si dhe trashëgimitë e Isaac Hayes dhe Tom Petty.
Beckman i tha gjithashtu Variety se tre të parët në këtë listë ishin kontaktuar për përdorimin e muzikës së tyre në “Melania”, por kishin refuzuar për arsye politike.
Ai sqaroi se anëtarët e Guns N’ Roses ishin të ndarë në vendim, i cili duhej të ishte unanim, ndërsa Jones “me sa duket nuk mundi ta kapërcente pengesën politike, pavarësisht faktit që filmi nuk është film politik”.
Sa i përket një kënge të kërkuar nga kolona zanore e filmit Phantom Thread, kompozuar nga Jonny Greenwood, Greenwood dhe regjisori Paul Thomas Anderson kërkuan heqjen e saj, duke përmendur mungesën e njoftimit nga mbajtësi i të drejtave, Universal. Muzika aktualisht mbetet në filmin e Brett Ratner, dhe Beckman tha se besonte se do të qëndronte aty “përgjithmonë, pavarësisht nga infrastruktura që shpërndan përmbajtjen”.
Beckman ia atribuoi pakënaqësinë e Greenwood “kohës fatkeqe në të cilën jetojmë”, duke shtuar se filmi “nuk hyn në asnjë lloj politike apo politike publike”. Ai tha gjithashtu se polemika nuk ia kishte zbehur admirimin për Radiohead, duke shtuar se do të vazhdonte ta dëgjonte muzikën e tyre “çdo ditë”.
Amazon pagoi 40 milionë dollarë për të drejtat e “Melania”-s dhe shpenzoi 35 milionë dollarë për marketingun. Filmi u shfaq në fillim të këtij muaji dhe deri tani ka arkëtuar rreth 16.4 milionë dollarë në mbarë botën, 98% e të cilave vijnë nga SHBA.
Filmi realizoi 7 milionë dollarë në SHBA në fundjavën e parë, përpara se të binte me 67% në javën e dytë. Në Mbretërinë e Bashkuar u hap në vendin e 29-të dhe më pas ra me 88% në vendin e 62-të. Aktualisht nuk ka orare shfaqjesh për filmin në Britani.
Beckman komentoi gjithashtu diferencën rekord mes vlerësimit të kritikëve në faqen agreguese Rotten Tomatoes dhe notave të publikut (të verifikuara përmes blerjes së biletave në Fandango).
“Cili është sot roli i një kritiku?” – tha ai. “Është më keq se paragjykimi. Është sikur votojnë, duke vendosur ideologjinë politike në plan të parë. Ka pasur kritika që kam lexuar që as nuk flisnin për filmin; flisnin vetëm për Presidentin Trump. Fatkeqësisht, ky është realiteti i shoqërisë sonë sot.”
Burimi: theguardian.com/ Përgatiti për botim: L.Veizi