Në një zhvillim të papritur që mund të ketë pasoja të mëdha për politikën e jashtme të SHBA-së dhe mbështetje për Ukrainën, Presidenti i SHBA-së, Donald Trump, bëri një ndryshim të papritur në qëndrimin e tij ndaj dërgimit të raketave Tomahawk në Ukrainë, pas takimit me Presidentin ukrainas Volodymyr Zelensky në Shtëpinë e Bardhë. Edhe pse Volodymyr Zelensky nuk u poshtërua këtë herë në Shtëpinë e Bardhë, siç ndodhi gjatë vizitës së tij të para pak kohëve në SHBA, ku Trump e dëboi nga zyra e tij, kjo nuk do të thotë se ai arriti gjithçka që kërkoi. Megjithëse diskutimi për dërgimin e raketave Tomahawk dhe mbështetje të tjera të rëndësishme për Ukrainën ishte në fokus, Zelensky u largua nga takimi i fundit me Trump duarbosh, pa siguruar ndihmën e dëshiruar. Pavarësisht propozimit të tij për tregti armësh dhe kërkesës për garanci sigurie, ai nuk mori angazhimin që priste nga SHBA për raketa dhe mbështetje më të gjerë ushtarake. Takimi mund të ketë nxjerrë në pah një angazhim të rinovuar për paqe, por edhe një refuzim të qartë për të avancuar në mënyrë të drejtpërdrejtë kërkesat ushtarake të Ukrainës.
Refuzimi i Trump
Në një atmosferë të tensionuar, Zelensky shpjegoi se Ukraina ka nevojë urgjente për raketa dhe teknologji të avancuar, përfshirë raketat Tomahawk dhe dronë të tjerë, për të mbrojtur territorin e saj nga agresioni rus. Megjithatë, Trump, i cili gjatë mandatit të tij ka pasur një qëndrim të ndryshëm, tani i bëri thirrje për prudencë, duke thënë: “Do të preferonim shumë më tepër që ata të mos kishin nevojë për Tomahawk, do të preferonim shumë më tepër që lufta të mbaronte.” Ky koment erdhi pasi Trump nënvizoi se Ukraina mund të rifitojë territorin e saj nëse SHBA dhe NATO ofrojnë mbështetje të mjaftueshme, por theksoi se një eskalim i mundshëm në përdorimin e raketave me rreze të gjatë veprimi mund të çonte në një situatë më të rrezikshme për gjithë rajonin.
Dronë në vend të raketave
Në një moment ku tensionet ndërkombëtare janë në kulmin e tyre, Zelensky nuk u shmang nga kërkesa e tij për mbështetje më të fortë. Ai propozoi një mundësi tregtie armësh, duke ofruar teknologjinë e avancuar të dronëve të Ukrainës në këmbim të ndihmës më të madhe nga SHBA. “Kemi një propozim të madh me dronët tanë,” theksoi Zelensky, duke shtuar se kjo mund të ishte një mundësi për të forcuar partneritetin mes dy vendeve dhe për të ndihmuar në përballimin e sulmeve ruse. Trump, i njohur për pragmatizmin e tij, reagoi pozitivisht, duke thënë: “Ata bëjnë një dron shumë të mirë.” Pavarësisht këtyre propozimeve, Trump shprehu rezervat e tij rreth një përshkallëzimi të mundshëm të luftës dhe theksoi se çdo vendim për raketat Tomahawk do të kërkonte një analizë të kujdesshme. “Do të flasim për këtë,” tha ai, duke shtuar se ky ishte një çështje serioze që mund të shkaktonte tensione më të mëdha në rajon.
Anëtarësimi në NATO
Ndërkohë, Zelensky theksoi rëndësinë e sigurisë dhe anëtarësimit të Ukrainës në NATO. “Gjithçka më e rëndësishme për njerëzit në Ukrainë që janë nën sulm është të kenë garanci sigurie,” tha ai, duke kërkuar garanci të dyanshme sigurie nga SHBA dhe partnerët perëndimorë. Ai po ashtu theksoi se Ukraina do të ishte e gatshme të negocionte një marrëveshje paqësore, por vetëm nëse siguria e Ukrainës sigurohej dhe territori i saj mbrohej. Përballë këtyre kërkesave, Trump theksoi se pavarësisht se nuk ishte i gatshëm të dërgonte raketa Tomahawk në këtë fazë, ai ishte i angazhuar për të ndihmuar në përfundimin e luftës, duke përmendur bisedën e tij të fundit me Presidentin rus Vladimir Putin. “Putin dëshiron ta përfundojë. Mendoj se Presidenti Zelensky dëshiron ta përfundojë. Tani duhet ta përfundojmë,” tha Trump, duke lënë të kuptohet se një marrëveshje paqësore mund të ishte e mundur, nëse presioni ndërkombëtar ndaj Putinit do të rritej./kb