Në Festivalin e Filmit Giffoni prezantohet dokumentari i Juventusit dhe Disney-t për fuqizimin e vajzave përmes futbollit. Me rrëfim të Francesca Michielin dhe me historinë e talentit të ri Anna Copelli
Nga Cinzia Conti
“Shpresoj të jem një frymëzim për të gjitha vajzat e vogla që duan të luajnë futboll.”
Pas fytyrës së saj të ëmbël dhe zërit të qetë fshihet shpirti i një sulmueseje të re, një vajze që ka zgjedhur një rrugë të vështirë në një sport që për shumë vite konsiderohej territor i burrave. Anna Copelli është një nga talentet e reja të akademisë së Juventusit në Vinovo, një futbolliste që klubi bardhezi e ka ndjekur prej kohësh dhe që premton të bëhet një emër i rëndësishëm i futbollit të femrave.
Së bashku me Sofia Cholovskaya nga Akademia e Juventusit në Al Khobar të Arabisë Saudite dhe Samantha Lee nga akademia e Los Anxhelosit në Shtetet e Bashkuara, Copelli është protagoniste e dokumentarit “Becoming Her: Before Growing Up”, një prodhim i Juventus Creator Lab, i cili do të publikohet në shtator në platformën Disney+, në hapësirën e ESPN.
Dokumentari u prezantua premierë në Festivalin e Filmit Giffoni, me narracionin e këngëtares Francesca Michielin, një tifoze e Juventusit dhe një zë i njohur për barazinë dhe fuqizimin e grave.
Filmi nuk tregon vetëm rrugëtimin sportiv të tri vajzave, por edhe momentin kur një fëmijë fillon të ndërtojë identitetin e saj, përpara se të bëhet atlete. Ai flet për ëndrrat, sakrificat, pengesat dhe forcën për të vazhduar përpara në një botë ku vajzat ende duhet të luftojnë për të fituar të njëjtin respekt si djemtë.
“Rruga është ende e gjatë”, tha Francesca Michielin. “Por sot flitet shumë më tepër për këto çështje sesa kur unë isha adoleshente. Fakti që këto histori tregohen në vende si Giffoni, përpara mijëra të rinjve, do të thotë se po krijojmë hapësirë, dukshmëri dhe vetëdije për brezat e rinj.”
Një vajzë mes djemve
Anna Copelli nisi të luante futboll kur ishte vetëm pesë vjeçe. Për vite me radhë ajo ishte vajza e vetme në skuadrat e përbëra nga djem.
“Ka qenë një përvojë që më ka formuar shumë, si futbolliste dhe si person. Kur nuk ke një shoqe skuadre ku të mbështetesh, detyrohesh të rritesh më shpejt”, tregon ajo.
Modeli i saj i parë është Alesandro Del Piero, por ajo admiron veçanërisht lojtaret e Juventus Women. “Kristiana Xhirelli dhe vajzat e tjera të ekipit të parë janë shembuj të vendosmërisë dhe pasionit. Të stërvitesh pranë tyre të bën të kuptosh sa shumë sakrificë kërkon ky sport.”
Për Michielin, projekti i Juventusit ka një vlerë që shkon përtej futbollit.
“Kam qenë gjithmonë tifoze e Juventusit. Idhujt e mi kanë qenë Del Piero, Bufon dhe Trezege. Por ajo që më preku më shumë është sistemi i vlerave që përcjell ky projekt. Nuk i jep vetëm dukshmëri futbollit të femrave; ai rrit ndërgjegjësimin.”
Sipas saj, rritja personale është një proces i vështirë: “Të rritesh është shumë më e ndërlikuar nga sa mendojmë, sepse kërkon zgjedhje. Edhe fjala greke krisis do të thotë pikërisht zgjedhje.”
Kur trupi të ndalon, por ëndrra vazhdon
Dokumentari nuk fsheh anën e dhimbshme të sportit. Ai tregon edhe dëmtimet, momentet e dobësisë dhe betejën psikologjike që çdo sportist duhet të përballojë.
Francesca Michielin, e cila në të kaluarën ka folur hapur për problemet e saj shëndetësore, rrëfen se gjatë xhirimeve është emocionuar thellë kur flitej për dëmtimin e rëndë të gjurit të Anna Copellit.
“Kam përjetuar vetë çfarë do të thotë të jesh i dëmtuar. Trupi nuk është një makinë që i bindet urdhrave; ai është një harmoni me veten tonë.”
Pas një ndërhyrjeje kirurgjikale të vështirë dhe një periudhe të gjatë rikuperimi, ajo thotë se mësoi përsëri t’i besonte trupit të saj.
“Nuk kam më frikë të rrëzohem. Kam mësuar ta përballoj rënien me qetësi dhe ta përdor atë përvojë për t’u rritur, pa krahasuar rrugën time me atë të të tjerëve.”
Edhe për Anna Copellin dëmtimi ishte një goditje e madhe.
“Nga një ditë në tjetrën humba një pjesë të vetes, pothuajse 50 për qind të asaj që isha. Ishte shumë e vështirë ta pranoja. Por pata pranë njerëz që më donin dhe më ndihmuan ta përballoja.”
Në fund, “Becoming Her: Before Growing Up” nuk është vetëm një film për futbollin. Është një histori për momentin kur lind një ëndërr, për guximin për ta ndjekur atë dhe për vajzat që para se të bëhen kampione në fushë, duhet së pari të zbulojnë forcën brenda vetes.
Sepse një futbolliste nuk lind vetëm kur prek topin për herë të parë. Ajo lind shumë më herët – në momentin kur vendos të besojë se mund t’ia dalë.