Last Updated on 02/04/2026 by Anisa
Ish‑deputetja dhe ish‑ministrja socialiste Ermelinda Meksi ka reaguar në rrjetet sociale pas vendimit të një gjykate federale amerikane që ndaloi përkohësisht një projekt të presidentit Donald Trump për ndryshimin e një pjese historike të Shtëpisë së Bardhë, pa miratimin e Kongresit. Vendimi u mor nga gjykatësi Richard Leon, i emëruar nga presidenti George W. Bush, dhe theksoi se presidenti nuk mund të veprojë përtej autorizimit ligjor të Kongresit.
Në një postim në faqen e saj zyrtare në Facebook, Meksi shkruan se ky vendim i gjykatës është një shembull i qartë i funksionimit të demokracisë: “Ky është një shembull i qartë se në SHBA askush nuk është mbi ligjin, as presidenti.” Ajo thekson se ky është një model i demokracisë në praktikë dhe një kujtesë se zbatimi i ligjit duhet të jetë mbi çdo autoritet politik.
Meksi vëren se vendimi i gjykatës tregon pikërisht kufizimin e pushtetit ekzekutiv, duke nënvizuar se presidenti është kujdestar i shtetit, jo pronar i tij, dhe asnjë veprim i kryer pa bazë ligjore nuk duhet të injorohet.
Por ajo shkon edhe më tej, duke bërë një lidhje me realitetin institucional në Shqipëri. Sipas Meksit, ky është një moment reflektimi për vendet që po diskutojnë ndryshime ligjore e madje kushtetuese, përfshirë edhe Shqipërinë. Postimi i saj argumenton se është koha që vendi të pyesë sa larg qëndron nga standardet ku institucionet janë të pavarura dhe ndalojnë pushtetin kur ai tejkalon ligjin, “sepse një demokraci e vërtetë nuk ka privilegje për askënd.”
Në reagimin e saj, Meksi sugjeron se Shqipëria mund të mësojë nga praktikat që forcojnë sundimin e ligjit dhe të ndërtojë mekanizma që rikthejnë besimin e qytetarëve në politikë.
Reagimi i plotë