Gazetarët e mediave shqiptare do të bëhen bashkë sot për të protestuar kundër qeverisë mbi një ligj që mund të cënojë jo vetëm të drejtat e punës së tyre, por edhe vetë thelbin e fjalës së lirë. Ligji i propozuar nga qeveria me kërkesë të kryeministrit Rama, duket se po cënon të drejtat dhe mbarëvajtjen e punës së mediave të lira, edhe pse ai pretendon se do të rregullojë punën e organeve mediatike.
Përpara parlamentit shqiptar do të jenë sot të gjithë gazetarët e mediave shqiptare kundër ligjit të censurës që qeveria do të kalojë sot në kuvend. Protesta që do të zhvillohet në orën 9.30 para kuvendit, duket se do të jetë e para e një morie protestash që do të organizohen kundër ligjit që gazetarët e konsiderojnë si të padrejtë dhe në cënim me liritë themelore të tyre.
Ndërkohë që Parlamenti pritet të miratojë sot paketën anti-shpifje, gazetarët do të jenë në një prej protestave të tyre të pakta. Organizatat e shoqërisë civile shqiptare të të drejtave të njeriut dhe organizatat përfaqësuese të gazetarëve paraqesin kërkesat, që sipas tyre janë tërësisht të përputhura me qëndrimet e Komisionit Europian dhe Komisioneres Mijatoviç si më poshtë:
Organizatat përsërisin kërkesën ndaj qeverisë shqiptare të tërheqë projektligjet nga procedura parlamentare. Gazetarët i kërkojmë qeverisë të pranojë vërejtjet e Komisionit Europian si dhe kërkesën e Komisioneres Mijatovic që specifikisht thotë: “interneti të mbetet i hapur dhe forum publik dhe që të mbizotërojë vetërregullimi në media, përfshirë median online”.
Organizatat theksojnë se në rast se shumica parlamentare do të votojë në kundërshtim të kërkesave të Komisionit Europian këto projektligje, beteja do të vijojë deri në rrëzimin e plotë të çdo tendence anti-demokratike dhe anti-europiane./Fjala.al/
