Grupi më i madh i tifozëve në Kosovë, ai i skuadrës së Prishtinës, “Plisat” u kanë shpërndarë dhurata fëmijëve në Durrës ditën e sotme.
“Plisat” ishin ndër të parët që i erdhën në ndihmë në mënyrë të menjëhershme vendit tonë pas tërmetit të 26 nëntorit 2019.
Përveç ndihmave që u dhanë familjeve të prekura nga tërmeti, ky grupim është rikthyer ditën e sotme në Durrës për të ngrohur situatën e për të krijuar atmosferë festash për fëmijët e këtij qyteti.
Tifozët e Prishtinës përgatitën dhurata për plot 507 fëmijë të shkollës 9-vjeçare “Naim Babameto” në Durrës.
Ata kishin si qëllim që në ditën e Krishtlindjeve fëmijët në Durrës të festonin sadopak dhe të harronin tmerrin që kaluan një muaj më parë.
Ky lajm u bë publik nga vetë “Plisat”, të cilët me anë të një postimi në “Facebook” kanë pasqyruar disa foto nga aktiviteti i sotëm./Përgatiti: Fjala.al/
