Burg përjetë ka qenë vendimi i Gjykatës vietnameze një ditë më parë për ish-ministrin e Informacionit për marrje ryshfeti, ndërsa pasardhësi i tij u dënua me 14 vite burg.
Gazeta online VnExpress, raporton se Nguyen Bac Son, 66 vjeç, i cili shërbeu si ministër i Informacioni në Vietnam nga viti 2011 deri në vitin 2016, mori dënim të përjetshëm për marrje ryshfetesh dhe shkelje të rregullave për menaxhimin dhe përdorimin e kapitalit të investimeve publike.
Prokurorët vietnamezë kërkonin dënimin me vdekje ndaj Son, për marrjen e një ryshfeti tre milionë dollarësh si pjesë e një marrëveshjeje ku kompania celulare “MobiFone” do të merrte 95% të aksioneve në firmën televizive “Audio Visual Global” (AVG).
Son shpëtoi nga dënimi me vdekje sepse familja e tij ktheu paratë një ditë para vendimit të Gjykatës.
