Partia Demokratike ka reaguar në lidhje me lajmin e djeshëm ku i ashtuquajturi “Zogu i Trianës” ishte përfshirë në shitblerjen e votave. Në bazë të një bisede me sms ku përfshihet edhe moderatorja Dajana Shabani, Hermes Lika përfitonte një shumë prej 20 mijë lekësh për të shitur votën e tij. Këtë shumë supozohet që t’ia jepte moderatorja më të cilën ai ka edhe marrëdhënie pune në një program televiziv.
Ka qenë sekretari Sekretari i ri i Përgjithshëm i Partisë Demokratike, Gazmend Bardhi i cili me anë të një statusi në Facebook ka ngritur edhe një herë shqetësimin e shitblerjes së votës në lidhje me rastin në fjalë. Sipas tij situata është me më e dënueshme për aq kohë sa bëhet fjalë për përfshirje të një prezantuese televizive.
Postimi i plotë i Gazmend Bardhit:
Në çdo përgjim të ligjshëm të prokurorisë, kur heton krimin e organizuar apo kur heton një rrjet prostitucioni, blerja e votës nga Edi Rama dhe Erion Veliaj është e kudogjendur. Edhe kur vetë kandidon, vetë voton, vetë numëron.
Përgjimi i një grupi të akuzuar për rrjet prostitucioni në Tiranë zbulon se për të nxitur qytetarët të votojnë, veçanërisht në Tiranë, janë paguar 20 mijë lekë. Është akoma më e dënueshme, kur në këtë pazar kriminal përfshihet një prezantuese televizive.
Sa kohë Edi Rama të jetë në krye të qeverisë, blerja e votave do vazhdojë. Ai ka bllokuar nëpërmjet prokurorisë së kontrolluar prej tij, hetimin dhe ndëshkimin për dosjet 339 dhe 184, pikërisht si garanci se askush që ble e vjedh vota nuk do të ndëshkohet.
Për Prokurorinë e Posaçme Kundër Korrupsionit (SPAK) dosja e re për blerjen e votës në Tiranë në votimet moniste të 30 Qershorit, është një test për t’i dhënë fund pandëshkueshmërisë së korrupsionit dhe krimit elektoral!
Dosje si kjo e Tiranës, apo famëkeqet 339 dhe 184 janë prova të pakundërshtueshme se largimi i blerësit dhe dhunuesit të votës të lirë, Edi Rama, si dhe garantimi i zgjedhjeve të lira e te ndershme, është nevojë urgjente për Shqipërinë./Fjala.al
