Pak ditë pas zgjedhjes së Olsian Çelës në krye të Prokurorisë së Përgjithshme, sot ky institucion ka caktuar Thoma Janon si zëvendësin e tij.
Numri dy i Prokurorisë së Përgjithshme, Thoma Jano, ka prekur kupolën e Prokurorisë, pas vitit 1997, kur punoi si kreu i Prokurorisë së Tiranës, gjatë kohës që organi i akuzës drejtohej nga Arben Rakipi.
Pas mbylljes së procesit të përzgjedhjes së Thoma Janos, kryeprokurori Olsion Çela është shprehur se sfida më e madhe për vitin 2020 është lufta për pastrim parash.
“Sfida jonë në 2020 është lufta për hetimin për pastrim parash. Ne gjithashtu gjatë këtij viti do dixhitalizojmë dosjet hetimore, ulim kostot e rrisim efiçencën” , -u shpreh ai.
Kujtojmë se disa nga dosjet e hetuara prej Olsion Çelës, janë çështja e Mirit të Xhikes pronarit të Kartodromit, dosja e trafikut nga grupi “Kompas”, si dhe çështja e viteve të fundit që njihet si dosja “Xibraka”, ku një nga të hetuarit është edhe Ermal Hoxha, i etiketuar si nipi i diktatorit Enver Hoxha.
Prokurori Olsian Çela ka pasur nën hetim edhe Emiljano Shullazin, çështje për të cilën u përplas edhe me drejtuesen e Prokurorisë për Krimet e Rënda në vitin 2017, Donika Prelën. Çela refuzoi te merrte dosjen “Shullazi”, në kohën kur prokurori Eneid Nakuçi u tërhoq nga çështja Shullazi për arsye shëndetësore. /Fjala.al
