Irani ka reaguar ashpër për vrasjen e komandantit të forcave iraniane Quds, vrasje kjo e urdhëruar nga Shtetet e Bashkuara të Amerikës.
Presidenti i Iranit, Hasan Rouhani ka deklaruar se Irani dhe kombet e lira të rajonit do të hakmerren ndaj SHBA-ve duke e cilësuar këtë vrasje si një krim makabër.
“Martirizimi i Soleimanit nga Amerika agresore dhe kriminele ka trishtuar zemrën e kombit iranian dhe kombeve të tjera të rajonit. Vdekja e Gjeneralit ka dyfishuar vendosmërinë e Iranit dhe kombeve të tjera të lira për t’i bërë ballë bullizmit të Amerikës dhe për të mbrojtur vlerat e Islamit. Ky akt i turpshëm dhe burracak është një shenjë tjetër që tregon se sa e dëshpëruar është Amerika”, -thuhet në komunikatën zyrtare të qeverisë iraniane.
Gjeneral Qassim Soleimani, një prej liderëve kryesorë të ushtrisë së Iranit, u vra në një sulm ajror amerikan në aeroportin ndërkombëtar të Bagdadit këtë të premte. Ky atentat shënon një përshkallëzim të madh në tensionet SHBA-Iran./Fjala.al
