Pensionistët kryefamiljarë përjashtohen nga taksa e ndërtesës. Lajmi është bërë i ditur nga Ujësjellës-Kanalizime Tiranë në një postim në rrjetet sociale, ku sqarohen procedurat që duhet të ndjekin përfituesit nëse nuk janë përjashtuar nga taksa e ndërtesës.
Sipas UKT, referuar nenit 22 pika 6 e Ligjit nr. 9632, date 30.10.2006 “Për sistemin e taksave vendore” i ndryshuar, përjashtohen nga taksa mbi ndërtesën kategoritë si vijon:
- Pasuritë e paluajtshme-ndërtesa, pronë e subjekteve juridike ose fizike, që në bazë të marrëveshjeve me bashkitë përdoren nga këto të fundit si banesa sociale
- Ndërtesat që përdoren nga komunitetet fetare, në funksion të veprimtarisë së tyre
- Ndërtesat e banimit, të deklaruara si vendbanim nga kryefamiljarët që përfitojnë vetëm pension pleqërie/pension social, kur familja e tyre përbëhet vetëm nga pensionistë, ose dhe me persona në ngarkim të tyre, që janë të paaftë për punë
- Ndërtesat e banimit të kryefamiljarëve që trajtohen me ndihmë ekonomike;
Ndaj për t’u përjashtuar nga taksa, pensionisti duhet të aplikojë pranë njësisë përkatëse administrative, duke paraqitur:
- Librezë uji ose Faturë uji
- ID (Kartë Identiteti)
- Librezë pensioni
