Ndërtimet pa leje, në zonat e planifikuara për ndërtim ose në zonat e reja për zhvillim, përjashtohen nga procedurat e legalizimit. Këto ndërtime do të shemben. Bëhet fjalë për shtëpitë ku qeveria ka parashikuar të ndërtojë lagje të reja ku do të stresohen të dëmtuarit nga tërmeti i 26 nëntorit.
Poseduesit e tyre përfitojnë sipërfaqe ndërtimore në objektet e reja që do të ngrihen në këto zona. Sipërfaqja që do të përfitojnë personat që do t’iu prishen shtëpitë është sa 50 % e sipërfaqes që disponojnë aktualisht. Vendimi është marrë në mbledhjen e Këshillit të Ministrave, është botuar në Fletoren Zyrtare dhe hyn në fuqi sot. Procedurat për përjashtimin nga legalizimi të këtyre ndërtimeve nisin me kërkesë të njësisë zbatuese.
Brenda 20 ditëve nga paraqitja e kërkesës për përjashtimin nga procesi i legalizimet të këtyre shtëpive , Agjencia Shtetërore e Kadastrës evidenton në terren ndërtimet pa leje në zonën për ndërtim/zhvillim dhe verifikon bazën e të dhënave të ndërtimeve pa leje, nëse për to është paraqitur aplikim për legalizim. Procedura e evidentimit shoqërohet me plotësimin/hartimin e këtyre dokumenteve: a) procesverbalin e evidentimit në terren; b) skicat fushore; c) genplanin e ndërtimit.
Drejtoria vendore e Agjencisë Shtetërore të Kadastrës kryen përjashtimin nga legalizimi për rastet e parashikuara në këtë vendim, me vendim. Ky vendim i njoftohet subjektit posedues, sipas mënyrës dhe afateve të parashikuara në Kodin e Procedurave Administrative, si dhe njësisë zbatuese, së bashku me dokumentacionin e praktikës përkatëse.
Sipërfaqja ndërtimore në objektet e reja për banim, që përfitojnë poseduesit e ndërtimeve pa leje, është 50 për qind e sipërfaqes së objektit pa leje ose sipas normave në fuqi sipas legjislacionit për strehimin social, cila të rezultojë sipërfaqe më e madhe. Nëse në ndërtimin pa leje banojnë më shumë se një familje, secila prej tyre trajtohet me banesë në ndërtimin e ri, sipas normave për strehim të parashikuara në legjislacionin në fuqi për strehimin social. Përfituesit kanë të drejtë të zgjedhin ndërmjet mundësive që parashikon kjo pikë sipas vullnetit të tyre. /Fjala.al/
