(*Foto e fundit e Boris Johnson në publik, pasi ishte konfirmuar me COVID-19)
Boris Johnson, kryeministër i Britanisë Madhe, është shtruar mbrëmjen e sotme në spital si pasojë e simptomave të vazhdueshme të koronavirusit. 10 ditë më parë Johnson konfirmoi se ishte infektuar me COVID-19, por do të drejtonte qeverinë ‘online’.
Por edhe pse zyrtarë nga qeveria theksojnë se shtrimi në spital është një masë paraprake, mediat britanike shkruajnë se kjo lëvizje i jep zë pretendimeve se shëndeti i kryeministrit është përkeqësuar.
Në orët në vijim pritet të mësohet më shumë mbi gjendjen shëndetësore të kreut të qeverisë britanike.
Për situatën mbi shëndetin e Boris Johnson ka reaguar edhe presidenti shqiptar, Ilir Meta: “Me shqetësim po ndjek gjendjen aktuale shëndetësore të z.Boris Johnson, Kryeministrit të Britanisë së Madhe, këtij vendi mik e partner shumë të rëndësishëm të Shqipërisë.
Duke i uruar shërim të shpejtë dhe të plotë, i shpreh solidaritetin dhe mbështetjen time gjatë këtyre ditëve të vështira për të dhe familjen e Tij!
Shpresoj që Kryeministri Johnson të kthehet së shpejti me energji të reja në krye të angazhimeve të Tij tepër të rëndësishme, në dobi edhe të forcimit të mëtejshëm të marrëdhënieve mes dy vendeve e popujve tanë!”
