Nga Anxhela Ruçi
Terrorizmi është një nga temat që raportohet në të rrallë në mediat shqiptare, me përjashtim të përkthimeve nga mediat botërore në ngjare të jashtëzakonshme.
Një nga problemet më të mëdha të raportimit të këtyre ngjarjeve është moscensurimi i pamjeve filmike apo fotografive të viktimave të sulmeve terroriste.
Jo rrallë herë edhe mediat shqiptare kanë rënë pre e shkeljes së etikës, duke transmetuar pamje filmike të pacensuruar në primetime ose në orare të tjera, kur televizori ndiqet edhe nga fëmijë apo persona nën moshën 18 vjeç.
Raste të tilla raportoheshin pothuajse përditë nga media, në kohën kur i ashtëquajturi “shteti islamik” rrëmbeu vëmendjen e medias me fëmijët që kryenin akte makabër apo me pamje filmike të viktimave të vrarë nga anëtarët e shtetit islamik.
Problemi i raportimit të çështjeve terroriste është një problem global, ku mediat bien pre e sensacionit dhe fillojnë shpërndajnë pamje të frikshme, të cilat në një farë mënyre rrisin audiencën e terroritëve dhe i bëjën ata më të njohur globalisht.
Në rrjetet sociale, nëse kërkon me fjalë kyçe, terrorizëm apo ISIS dalin me mijëra artikuj dhe video të pacensuruara, të përgatitura nga “zyra e shtypit” të shtetit islamik.
Shumë video në kanalet e youtubit, të shpërndara nga media prestigjoze numërojnë miliona shikime, mënyrë kjo që tregon se sa të prirur janë ndjekësit të shikojnë dhe pëlqejnë veprimet e dhunshme.
Media ka një funksion jo vetëm informues por edhe argëtues, siç quhet ndryshe “infoteimant”, prandaj media duhet të bëjë kujdes në mënyrën sesi raporton disa çështje siç është terrorizmi. Përsëritja e vazhdueshme e informacionit dhe transmetimi i tij në mënyrën jo të duhur mund të kthehet bumerang dhe ndërkohë që ajo ka mision informimin, mund të bëhet nxitëse e dhunës.
