Aktori i mirënjohur shqiptar, Gulielm Radoja ka reaguar kundër planit të bashkisë së Tiranës për të shembur godinën e Teatrit Kombëtar. Në një video-mesazh të publikuar pak minuta më parë, Radoja e konsideron krim planin për shembjen e godinës, e megjithatë paralajmëron se aktorët dhe aktivistët do të fitojnë.
“Ndihem shumë i emocionuar për atë që po ndodh me teatrin tonë. E ndjej si detyrim të them dy fjalë: nuk ka gjë më të turpshme sesa kjo që po ndodh, por më shumë se e turpshme, ky është një krim. Është një krim i atyre që thonë “unë jam mbreti dhe bëj çfarë të dua”, por ata do të mbyten me të keqen e tyre. Jam me ju pavarësisht se jam në Durrës dhe nuk vij dot. Unë jam me ju. Ne do të fitojmë”, shprehet Gulielm Radoja.
