31 është numri zyrtar i personave të vdekur në Shqipëri si pasojë e koronavirusit, çka e bën vendin tonë një prej më pak të prekurve në Evropë nga pandemia. Ndërkohë, INSTAT ka publikuar të dhënat e tre mujorit të parë, që tregojnë një ulje të numrit të vdekjeve në Shqipëri krahasuar me 1 vit më parë.
Në periudhën janar-shkurt-mars 2020, kur mendohet të ketë qenë ‘piku’ i pandemisë, janë regjistruar 6115 vdekje, çka do të thotë rreth 4% më pak se e njëjta periudhë në vitin 2019, kur u regjistruan 6361 vdekje, raporton Fjala.al.
Nëse i shohim statistikat sipas qarqeve, vetëm Korça ka raportuar për këtë tre mujor më shumë vdekje se tre mujori i 2019-ës, ndërsa në qarqet e tjera ka rënie. 628 është numri i vdekjeve në qarkun e Korçës në tre mujorin e parë të 2020-ës, ndërsa vjet shifra ishte 611.
INSTAT bën me dije se këto statistika do të rishikohen, pasi ka patur jo pak vështirësi në grumbullimin e të dhënave për shkak të izolimit nga COVID-19. Në media ka patur shpesh diskutime nëse është fshehur shifra reale e personave që kanë humbur jetën në Shqipëri si pasojë e COVID-19, ndërkohë që të dhënat e INSTAT paraqesin një situatë tjetër./Fjala.al
