Zëvendëskryetari i LSI-së Luan Rama bën një analizë se çfarë lloj lideri është Lulzim Basha. Në emisionin “HARD TALK NGA ROLAND QAFOKU”, Rama tha se Lulzim Basha është një lloj politikani shumë ndryshe nga të gjithë drejtuesit e partive kryesore shqiptare në këto 30 vjet tranzicion.
-Personalisht ju zoti Rama, i besoni Lulzim Bashës?
-Natyrisht unë i besoj kauzës politike mbi të cilën është ndërtuar gjithë diskursi politik i opozitës në krye të së cilës është Lulzim Basha. Por nuk është çështja e raportit që kam unë si Luan si individ, me Lulzim Bashën si individ.
-Çfarë lloj politikani është Lulzim Basha dhe çfarë lloj kryeministri do jetë nesër Lulzim Basha?
-Lulzim Basha është profili i një politikani me përmasë qytetare. Nuk dua t’i referohem thjesht jetës së tij, shkollimit dhe prejardhjes së vet por natyrisht ai ka profilin e vet dhe në qasje me këtë profil është përpjekur dhe kur i është dashur ka ndërmarrë veprime radikale brenda strukturave të partisë së vet.
Për ta shkëputur Partinë Demokratike nga një pjesë e lidership-it që prej vitesh e dominonte udhëheqjen e asaj partie. Nuk ka qenë e thjeshtë dhe nuk ka qenë e lehtë që në zgjedhjet e 2017 ai të vendoste të largonte nga listat e kandidatëve për deputetë disa prej figurave emblematike të asaj partie.
Ai ndërmori një aksion politik dhe kreu një aksion radikal mbi bazën e bindjes së vet dhe të asaj që ai gjykoi se është më e drejtë për PD. Unë gjykoj nga pikëpamja e asaj që po ndodh sot, për një pjesë të emrave kishte të drejtë.
https://youtu.be/GVyji-7-ArU
