Kreu i Zyrës për Mbrojtjen e Konsumatorit, Hasan Stafa, në një prononcim për gazetën “Fjala”, shprehet se ndaj dy institucioneve financiare ka shumë ankesa nga qytetarët, të cilat i ka referuar në Bankën e Shqipërisë dhe në Ministrinë e Financave
Për normat e larta të interesit e të komisioneve dhe për penalitetet që s’njohin asnjë limit, të aplikuara nga IuteCredit dhe Kredo.al, është në dijeni Banka e Shqipërisë, Ministria e Financave dhe Autoriteti i Mbikëqyrjes Financiare. Kreu i Zyrës së Mbrojtjes së Konsumatorit, Hasan Stafa, në një prononcim për gazetën “Fjala” pohon se merr çdo ditë ankesa nga konsumatorët për këto institucione financiare. “Konsumatorët ankohen se nuk vihen në dijeni të interesave dhe as komisioneve. Ata joshen nga rekalmat dhe bisedat me punonjësit e këtyre zyrave. Përballen me tarifat e larta, pasi hyjnë në muajin e dytë ose të tretë të kredisë, kur përballen me rritjen e faturës” -thotë Hasa. Ai pohon se ankesat që vijnë në zyrën e tij i adreson pranë Bankës së Shqipërisë, Ministrisë së Financave dhe Ekonomisë, ku ka një zyrë për mbrojtjen e konsumatorit dhe pranë Autoritetit të Mbikëqyrjes Financiare.
Denoncimet
Vetëm gjatë këtij viti në Zyrën e Mbrojtjes së Konsumatorit janë administruar 27 kërkesa. Pjesa më e madhe e tyre para mbylljes së vendit për shkak të pandemisë. Vetëm gjatë këtij muaji janë depozituar 11 ankesa. “Konsumatorët ankohen, pasi ofertat që dëgjojnë nuk kanë lidhje me faturën përballë së cilës vihen pas muajit të parë. Një pjesë prej tyre vendosin ta marrin huanë, vetëm pasi janë njohur gojarisht me ofertën, ku nuk u thuhet se sa është interesi. Pasi paguajnë këstin e parë, përballen me këste më të larta apo penalitete, në rast vonese për dy ose tri ditë”,- thotë Hasan Stafa, kreu i Zyrës së Mbrojtjes së Konsumatorit.
Rregullorja
Në rregulloren e miratuar nga Banka e Shqipërisë “për licencimin dhe ushtrimin e veprimtarisë nga subjektet financiare jobanka”, në nenin 8 përcaktohet detyrimi i këtyre institucioneve për të qenë transparente me konsumatorin. Institucionet financiare e kanë detyrim ligjor transparencën me klientin, mbrojtjen e konsumatorit. Këto institucione kanë një sërë detyrimesh ligjore për të zbatuar. Në nenin 8 të rregullores ku parashikohet kërkesa në lidhje me dokumentacionin për subjektin financiar jobankë, institucionin financiar të mikrokredisë dhe institucionin e parasë elektronike, thuhet se institucioni ka detyrim “transparencën me klientin (mbrojtjen e konsumatorit), administrimin e rreziqeve; parandalimin e pastrimit të parave dhe financimin e terrorizmit, duke përfshirë një program masash në përputhje me legjislacionin në fuqi, për parandalimin e pastrimit të parave”. Sipas rregullores, kredia që mund të jepet nga këto institucione duhet të jetë jo më e madhe se 600000 (gjashtëqind mijë) lekë ose kundërvlefta e saj në valutë.
Hasan Stafa
Kreu i Zyrës për Mbrojtjen e Konsumatorit, Hasan Stafa, në një prononcim për gazetën “Fjala” pohon se ka shumë ankesa në adresë të zyrës së tij për institucionet financiare jo bankare.
A vijnë në zyrën tuaj ankesa për agjencitë financiare jo bankare?
Po, vijnë shumë ankesa. Gjatë këtij viti kemi marrë 27 ankesa, 11 prej tyre vetëm gjatë këtij muaji.
Pse ankohen konsumatorët?
Konsumatorët deklarojnë se gënjehen nga reklamat. Nuk kanë qartë interesat dhe përballen me fatura të kripura, sidomos pas muajit të parë që fillojnë shlyerjen e kredisë. Ankohen për komisionet e larta që aplikohen për çdo ditë vonese, pasi në fillim nuk janë njohur me këto penalitete.
A nënshkruajnë kontratë konsumatorët?
Ka prej tyre që ankohen se kanë firmosur pasi janë njohur gojarisht me faktin sa zgjat kredia dhe këstet mujore. Kanë firmosur edhe pa e lexuar, disa prej tyre.
Ku i adresoni ju këto ankesa?
I kam adresuar në Bankën e Shqipërisë, në Ministrinë e Financave për zyrën për mbrojtjen e konsumatorit që është në varësi të kësaj ministrie dhe pranë Autoritetit të Mbikëqyrjes Financiare. Pastaj janë këto institucione që merren me ndjekjen e çështjes.
