Konfindustria i ka kërkuar qeverisë dhe grupit të menazhimit të krizës kundër Covid-19, që të rikthejnë në normalitet jetën ekonomike për të gjitha bizneset si dhe lirinë e plotë të lëvizjes së qytetarëve në të gjithë vendin.
Përmes një deklarate, konfindustria shpreh se këto kufizime i kanë shkaktuar një dëm kolosal ekonomisë, që llogaritet në 1,2 miliardë dollarë, 1% për atë formale, dhe mbi 2 miliardë dollarë për atë reale.
”Konfindustria i kërkon ekzekutivit dhe grupit të menaxhimit të krizës kundër Covid 19 rikthimin e menjëhershëm në normalitet të jetës ekonomike për të gjithë kategoritë e biznesit në hapësirat gjeografike në shkallë vendi pa përjashtim dhe pa pritur afatin subjektiv kohor të paracaktuar të 1 qershorit. Gjithashtu, është shumë e rëndësishme dhënia e menjëhershme e lirisë së plotë të lëvizjes së qytetarëve në të gjitha qarqet e vendit”, thuhet në njoftim.
Konfindustria shpreh shqetësimin për vonesat e tejskajshme dhe të paarsyetuara të rikthimit në normalitet te jetës ekonomike në vend. Shqipëria, pavarësisht se praktikisht nuk kishte asnjë pasojë nga pandemia globale Covid 19, është vendi i fundit, në lehtësimin e masave shtrënguese.
“Të gjitha vendet historike të BE, që u prekën më dhjetëra herë më rëndë sesa Shqipëria nga kriza shëndetësore e Covid 19, zbatuan masa shumë herë më të lehta të izolimit dhe njëkohësisht janë shumë më përpara në rikthimin në normalitet. E njëjta gjendje është edhe për vendet e Rajonit, që praktikisht janë rikthyer në normalitet të plotë. Përfundimi është një faturë financiare shumë më e rëndë krahësimisht vendeve të tjera për qytetarët dhe goditje e fortë ndaj fuqisë së konkurrencës të ekonomisë shqiptare”, thuhet më tej.
Konfindustria vlerëson, se masat shumë jo përpjesëtimore ndaj rrezikut shëndetësor real dhe sidomos vonesat e rikthimit në normalitet të lëvizjes së qytetarëve dhe aktivitetit të bizneseve, i kanë shkaktuar një dëm kolosal të papërligjur ekonomisë kombëtare.
Vetëm në muajt mars dhe prill 2020 vlerësimit e Konfindustrisë, të pranuare dhe nga përfaqësues të ekzekutivit, kanë përllogaritur një dëm ekonomik prej më shumë se 1,2 miliardë $ për ekonominë formale dhe mbi 2 miliardë $ për ekonominë reale të Shqipërisë.
Nga vlera e mësipërme të paktën 350 milionë $ përllogariten të jenë dëme të shkaktuara drejtpërdrejtë nga keqmenaxhimi i krizës. Fatura e mësipërme po vazhdon të rritet me çdo minutë, çdo orë dhe çdo ditë vonesë drejt rikthimit në normalitet.
Konfindustria vlerëson, se vonesat e papërligjura, jo profesionale dhe të paarsyetuara për rikthimin e jetës normale në vend, përveç rëndimit shkatërrimtar të faturës financiare për qytetarët, biznesin dhe ekonominë kombëtare në afatgjatë, rrezikojnë të vënë në pikëpyetje dhe të zbehin krejtësisht vetë-qëllimin dhe të gjithë masat e ndërmarra deri më tash nga ekzekutivi kundër Covid 19.”/b.b/fjala.al
