Kreu i Partisë Demokratike, Lulzim Basha është takuar ditën e sotme me drejtuesit e Shoqatës së Investitorëve të Huaj në Shqipëri. Në takimin me ta, lideri i opozitës tha se nuk ka prioritet më të madh për shqiptarët sot, se sa të kthehet besimi te ekonomia dhe të nxitet punësimi si emergjencë kombëtare.
“Krijimi i lehtësirave dhe kushteve për të thithur sa më shumë investime të huaja, që hapin vende pune, është prioriteti ynë strategjik. Konkurrenca e pandershme, korrupsioni, burokracia dhe informaliteti i lartë janë në krye të listës së shqetësimeve të tyre.
I sigurova përfaqësuesit e Shoqatës së Investitorëve të Huaj se në qeverisjen e ardhshme thithja e investimeve të huaja do të jetë prioritet strategjik, krahas mbështetjes së biznesit e prodhimit vendas. Reformat që ne do të ndërmarrim do të çmontojnë konkurrencën e pandershme, do të eliminojnë burokracitë e tepërta dhe do të luftojnë korrupsionin”, u shpreh kryedemokrati.
Basha premtoi më tej se do t’i jepet fund ndryshimit të papritur dhe të pakonsultuar të rregullave, duke kthyer sigurinë juridike dhje se politika transparente dhe afatgjatë për taksat dhe hapja e lojës duke çmontuar monopolet dhe trajtimet preferenciale do të garantojnë konkurrencë të ndershme në vend të klientelizmit korruptiv të qeverisë.
“Taksa e sheshtë 9%, heqja e taksës “Rama” mbi karburantin, eliminimi i lejeve, licencave dhe autorizimeve që pengojnë konkurrencën e lirë dhe të drejtë do të jenë hapa të menjëhershëm. Shqipëria do të shohë përpara dhe prioriteti im absolut është të luftoj për të mbrojtur dhe hapur çdo vend pune të mundshëm.
“Shqipëria në punë” nuk është thjesht një moto, por një platformë reale. Me planin tonë ekonomik do të sprapsim krizën “Rama” dhe do mund të hapim vende të reja pune, të fuqizojmë ekonominë dhe të rrisim mirëqenien e shqiptarëve”, tha ndër të tjera Basha./Bl.Ba/Fjala.al
