Thuajse të gjithë shqiptarët e kanë parë dhe e duan skeçin e njohur “Doni më për Belulin?” të luajtur me aq mjeshtëri nga aktori i njohur Fuat Boçi i cili u nda sot nga jeta në moshën 89-vjeç.
Pa dyshim që ky skeç mund të quhet dhe roli i tij i jetës. Me këtë rol ironizohen të gjithë ata “gjeni” që gjithë kohën flasin për veten e tyre.
Për më tepër shikoni skeçin.
Po kush ishte Fuat Boçi
Fuat Boçi u lind në Voshtinë në vitin 1931. Rrugën e artit e nisi qysh në moshë të re me pasion e dashuri. Nga elektriçist e kinomekanik, ai u bë artist. Mbaroi shkollën e mesme të aktrimit pa shkëputje nga puna, në të mirnjohurën “Jordan Misja”.
Fuat Boçi ka marrë pjesë në rreth 160 premiera duke luajtur mbi 600 role. Aktrimi i tij shquhet për lirshmërinë , karakterizimet e holla të personazheve, hijeshi, sjelljet plot nur, mimikën komike, gjestet shprehëse. Në rolet e tij ai ka përdorur me mjeshtëri nuancimet gjuhësore krahinore duke sjellë në skenë tipa fshatarësh të zgjuar, njerëz hileqar apo dembel, zyrtarë të korruptuar dhe pseudointelektualë.
Nga artist amator arriti majat e larta si profesionist në teatrin “Bylis” të Fierit. Për punë të shquar e talent të spikatur në role e karaktere është nderuar me keto çmime:
Medalja e Punës
Medalja “Naim Frashëri”
Urdhëri “Naimi Frashëri” i klasit të dytë.
Artist i Merituar
Qytetar Nderi i Fierit
Është anëtar i Lidhjes së Shkrimtarëve dhe Artistëve të Shqipërisë.
la.mi/Fjala.al
