Nga Luan Shahollari
Sistemi bankar i nivelit të dytë në Shqipëri përbëhet nga 12 banka , nga të cilat 7 me kapital (aktive) 100% të huaj, 1 me kapital 100% shqiptar dhe 4 me të përzier shqiptar dhe të huaj. Të gjitha këto së bashku në vitin 2019 zotëronin një kapital prej 1,487,135,032 mijë lekë ose 12.2 miliard euro. Nga këto 1.209.752.300 mijë lekë (mbi 9.9 miliard euro) ose 81 % e zinin depozitat e qytetarëve dhe biznesit. S’kemi-s’kemi, por depozitat shënuan rritje prej mbi 5% më 2019 kundrejt vitit 2018.
Bankat janë private dhe rregullohen nga statutet e tyre përkatëse që bazohen në ligjet e shtetit shqiptar. Duke mbajtur parasysh që pjesa më e madhe e aktiveve të tyre vjen nga depozitat, bankat kanë interesin e tyre të bëjnë një politikë tërheqëse ndaj klientëve (qytetarë dhe biznese) pasi kështu fitojnë si nga dhënia e kredive ashtu edhe e shërbimeve që kryejnë.
Me të drejtë bankat,si gjithë institucionet e tjera, kanë marrë masat e tyre për t’u mbrojtur nga pasojat e pandemisë të shkaktuar nga Covid-19. Por duket se këtë e kanë bërë në dëm të klientëve të tyre pasi të bije në sy fakti që (në disa prej tyre) po krijohen radhë të gjata (apo të gjera) në natyrë, në trotuar, për më tepër edhe në diell!
Mjaft “interesant” është edhe fenomeni tjetër: radhën e mban dhe numrat e radhës i jep një “polic” (ruajtës i objektit) shpesh me uniformë jo të rregullt. Kështu që është krijuar një kontrast: ata që mbajnë bankën me para presin në diell (35 gradë) kurse “shërbëtorët” e tyre brenda me ajër të kondicionuar dhe temperaturë konstante!
Sigurisht nuk sugjerojmë të kundërtën, por shefat aty brenda bankës të huaj apo vendas të “vrasin mendjen” e të gjejnë zgjidhje qytetare për klientët e tyre, pasi ata jenë edhe investitorët e tyre! Një gjë është e sigurt: bankave nuk u mungojnë paratë për një shërbim më të mirë! Në vitin 2019 ato kanë shënuar një fitim prej 1.209.752.300 mije lekë (99 milion euro)!
La.Mi/Fjala.al
