Ka qenë një mbrëmje me të vërtetë e paharruar kjo e 27 gushtit 2020 për ekipet shqiptare në veprimtarinë e dytë të klubeve të kontinentit, Ligës së Evropës, pasi të 3 skuadrat pjesëmarrëse, fituesja e Kupës, Teuta, nënkampionia, Kukësi, por edhe Laçi i vendit të 4-t, siguruan kualifikimin për në turin e dytë. Me pak fjalë, sot Evropa foli shqip! Në të gjithë kuptimin e plotë të fjalës, pasi të 3 ekipet shqiptare pjesëmarrëse në këtë tur eliminator të Ligës së Evropës bënë detyrën në mënyrë bindëse, edhe pse në trajta të ndryshe nga njëra-tjera.
Fillimisht ishte Teuta, e cila mposhti me rezultatin e pastër 2-0 Beitar Jeruzalemin në fushën e vet, në Stadiumin “Niko Dovana” të Durrësit dhe siguroi kështu kualifikimin për në turin tjetër të kësaj veprimtarie kontinentale. Skuadra durrsake kaloi shumë shpejt në epërsi, që në minutën e 6-të, me golin e Krasniqit.
Me këtë epërsi minimale të bregdetarëve u mbyll pjesa e parë, por ekipi shqiptar luan mirë dhe në minutën e 86-të është Hebaj, i cili shënon dhe vulosi fitoren 2-0 të Teutës. Dhe bashkë me të, edhe kualifikimin e saj në turin tjetër të Ligës së Evropës.
Më pas e kishte radhën Laçi, që vuajti më shumë, pasi u kualifikua pas goditjeve nga pika e bardhë e 11-metërshve në vizitinë që i bëri në Azerbajxhan Keshlas vendase. 90 minutat e kohës së rregullt dhe shtesat nga 15 minuta secila u mbyllën me rrjeta të paprekura. Ishte Nuabueze që e nisi vazhdën e saktë të 11-metërshve, i ndjekur nga Lushkja, Rapo, Mazrekaj dhe Ignjatoviçi, të cilët nuk gabuan nga pika e bardhë. Heroi i Laçit ishte portieri Sherri, i cili priti 11-metërishin e ekzekutuar nga Kyrtymov i Keshlas, duke sigluar kualifikimin në turin tjetër.
Në takimin e fundit të mbrëmjes, Kukësi mundi 2-1 Sllavian e Sofias, në ndeshjen e zhvilluar në Stadiumin “Arena Kombëtare”, siguruar edhe ai kalimin në turin e dytë të Ligës së Evropës. Sulmuesi Eze Frajdej kaloi ekipin shqiptar në epërsi, teksa u tregua i saktë nga pika e bardhë e 11-metërshit në minutën e 55-të, por skuadra e kryeqytetit bullgar barazoi shifrat në minutën e 81-të me anë të Krastevit. Pesë minuta nga fundi i kohës së rregull, ishte sulmuesi Kuper, i cili shënon një gol mjaft të bukur, që vlejti edhe kualifikimin./Bl.Ba/Fjala.al
