Trajneri italian me pasaportë shqiptare udhëheq Azerbajxhanin drejt fitores 1-0 në Qipro. Xhovani de Biazi e ka udhëhequr skuadrën e tij të re, Azerbajxhanin, drejt së parës fitore në dy ndeshjet e para nën drejtimin e tij. Ish-trajneri i Shqipërisë nuk e ka fshehur kënaqësinë teksa ka parë skuadrën e tij të marrë të martën në mbrëmje një fitore minimale, por mjaft të vyer, në Qipro, përballë përfaqësueses vendase. Ka debutuar me një humbje zhgënjyese, 1-2 në shtëpi përballë Luksemburgut në takimin e parë, të zhvilluar para 3 ditësh, por nuk ka vonuar të tregojë aftësitë e tij si trajner, duke e udhëhequr skuadrën e tij të re, Azerbajxhanin, drejt së parës fitore në dy ndeshjet e para nën drejtimin e tij.
Xhovani de Biazi nuk e ka fshehur kënaqësinë teksa ka parë skuadrën e tij të marrë të martën në mbrëmje një fitore minimale, por mjaft të vyer, në Qipro, përballë përfaqësueses vendase. Për më tepër, skuadra e tij e ka arritur këtë fitore në një mënyrë bindëse, teksa edhe vetë faqja në internet e UEFA-s pohonte në raportimin e saj se përfaqësuesja azere mund dhe duhej të kishte shënuar më shumë gola. “Ishte një ndeshje shumë e mirë”, – ka deklaruar ish-trajneri i Shqipërisë, duke folur pas ndeshjes në Qipro. “Ne mund të shënonim më tepër gola në pjesën e parë”, – ka vijuar ai. “Por jemi të kënaqur që rezultati i takimit ishte në favorin tonë, sepse pjesa e dytë ishte e lodhshme e pati edhe pak tension brenda”, – ka shtuar italiani që ka edhe pasaportë shqiptare, i cili ka shprehur edhe kënaqësinë që skuadra e mbylli ndeshjen me 11 lojtarë. “Bëmë disa ndryshime në krahasim me ndeshjen me Luksemburgun, – ka rrëfyer 64-vjeçari. – Megjithatë, pati disa gjëra që nuk më pëlqyen.
Por më e rëndësishmja është dëshira që lojtarët kanë për të luajtur.” “E kam thënë që nga dita e parë që ne duhet të besojmë te suksesi dhe te fitorja. Nëse e bëjmë këtë, do të kemi shumë fitore si kjo e sotmja. Sot skuadra jonë fitoi dhe, më e rëndësishmja, brenda një periudhe kaq të shkurtër kohe, lojtarët e mi ishin në gjendje të nxirrnin mësime nga humbja dhe të tregonin karakter”, – ka përfunduar trajneri i Azerbajxhanit, Xhovani de Biazi. Në dy takimet e radhës, ato që luhen në gjysmën e parë të tetorit, Azerbajxhani i trajnerit italo-shqiptar viziton Malin e Zi, për të pritur më pas në shtëpi Qipron./Ra.My.Fjala.al/
