Presidenti meksikan Andres Manuel Lopez Obrador i dërgoi një letër Papa Françeskut, duke i kërkuar që Kisha Katolike të kërkojë falje për “mizoritë” që popujt indigjenë përjetuan përgjatë pushtimit spanjoll të vitit 1521.
Lajmi është publikuar nga mediat meksikane, të cilat raportojnë se vendimi erdhi pasi autoritetet meksikane hoqën dorë zyrtarisht nga restaurimi i një statuje të Kristofor Kolombit në Mexico City, dy ditë para një proteste, e cila pritej të zhvillohej me 12 tetor, në përkujtim të ditës së zbulimit të Amerikës .
Lopez Obrador e ripërsëriti propozimin e tij, të bërë tashmë në të kaluarën, ku Kisha Katolike së bashku me monarkinë spanjolle dhe shtetin meksikan, duhet të kërkojnë falje për popujt autoktonë, të cilët 500 vite më parë u plaçkitën dhe u robëruan.
Me datë 12 tetor në Meksikë festohet dita e Racës, në respekt të bashkëjetesës së popullsisë indigjene dhe europiane në vend.
Në muajt e fundit, aktivistë nga qytete të ndryshme anembanë Shteteve të Bashkuara kanë shkatërruar dhe vandalizuar disa statuja të ngritura për nder të Kolombit, me pretendimin se ato simbolizojnë gjenocidin dhe shfrytëzimin e popullsisë autoktone në Amerikë.
Kisha katolike luajti një rol kryesor përgjatë kolonizimit spanjoll të amerikave, si dhe mbështeti misionet për konvertimin e njerëzve indigjen në fenë e krishterë.
Në vitin 2015, Papa Françesku i kërkoi falje Bolivisë për rolin që pati Kisha Katolike në shtypjen e popullsisë në Amerikën Latine, gjatë epokës së pushtimit spanjoll./Re.D/Fjala.al
