Tirana dhe Kastrioti kanë zhvilluar të mërkurën një ndeshje miqësore, në vijim të përgatitjeve të tyre në pritje për nisjen e sezonit të ri të mbetur pezull për shkak të bojkotit të Ligës Profesioniste të Futbollit. Në takimin e zhvilluar në Stadiumin “Selman Stërmasi” të kryeqytetit dhe të sjellë për sportdashësit drejtpërdrejt nga Rrjeti i Radio-Televizionit Shqiptar, trajneri Emanuel Egbo hodhi në fushë në 11-shen e parë për Tiranën Likën, e më pas Tolin, Vangjelin, Hoxhallarin, Ismajlgecin, Giamfinë, Bathën, Torrasës, Kobinanë, Dansonë dhe Sasrakun.
Ndërsa homologu Ramadan Ndreu i Kastriotit u përgjigj me Pujën në portë e më pas me Deliajn, Çelën, Bojomin, Prodanin, Mehmetin, Huseinin, Okebukun, Moraeshin, Bardhin dhe Da Silvën. Pjesa e parë ka parë bardheblutë të bëjnë një vëllim më të madh loje, por pa e konkretizuar atë, ndërsa krutanët kanë qenë mjaft cinikë, duke rrezikuar madje 3 herë brenda çerekorës së parë, por gardiani kryeqytetas, Lika, ka qenë në lartësinë e duhur. Me kalimin e kohës, Tirana mundohet të kundërpërgjigjet, por Kastrioti mbrohet me kujdes.
Dhe, për rrjedhojë, 45 minutat e para mbyllen me rrjeta të paprekura. Ato të dytat nisin me të njëjtën tablo, me Kastriotin që e pret Tiranën në zonën e vet dhe mundohet ta godasë me kundërsulme, një strategji që jep fryte në minutën e 54-t, kur Bardhi do të finalizojë me shpejtësi dhe me sukses një sulm të krutanëve dhe do të kalojë Kastriotin në epërsi. Tirana do të mundohet të reagojë dhe ka ndërtuar raste për shënim, ndërsa takimi ndikohet edhe nga ndërrimet e shpeshta dhe të shumta që të dy trajnerët bënë përgjatë gjysmëorës së fundit të ndeshjes.
Sidoqoftë, trysnia e bardhebluve jep fryte në minutën e 75-të, kur Muçi ruan gjakftohtësinë në zonë dhe godet saktësisht, duke përshëndetur rrjetën. Përtej përpjekjeve të Tiranës në çerekorën e fundit, mbyllet në barazim 1-1 kjo miqësore, me Kastriotin që bëri një paraqitje mjaft të mirë, që premton për sezonin e ri në këtë rikthim në Kategorinë Superiore.
Pa.Va/Fjala.al
