Ervin Salianji, Tritan Shehu dhe Endri Hasa janë disa nga emrat e skualifikuar nga Komisioni i Vlerësimit të Kandidatëve pranë Partisë Demokratike.
Burime për Fjala.al, bëjnë me dije se skualifikimi i 13 ish-deputetëve të PD-së të legjislaturës së fundit prodhoi zhurmë, ku përveç emrave të lartëpërmendur, një ditë më parë u mësua se nga lista e propozuar u përjashtua edhe Nadire Meçorapaj, ish-deputete e Vlorës, Romeo Gurakuqi, i cili në 2017 ishte i pari në Shkodër, Lindita Metaliaj që u zgjodh deputete në Lezhë në 2017, apo Fatbardha Kadiu në Durrës.
Mësohet se z.Halim Kosova është dorëhequr vetë, përmes një mesazhi dërguar kryetarit të Partisë Demokratike, Lulzim Basha, ku për rrjedhojë nuk është futur në listën e komisionit.
Kujtojmë se nëpërmjet votës kundër anëtarësia e Partisë Demokratike ndëshkoi ish deputetët Hekuran Hoxholli në Korçë, Klevis Balliun në Pogradec dhe Astrit Veliaj në Berat.
Por anëtarësia e PD ishte e ashpër edhe me ish kryebashkiakët, duke përjashtuar tre prej tyre, Bashkim Shehun e Kukësit, Besnik Dushajn e Tropojës dhe Eduard Kaprin e Pogradecit.
Tashmë do të jetë Kryesia e Partisë Demokratike ajo që do të ketë në dorë listën me 326 emra, ndër të cilët do të përzgjedhë 80% të listës finale, ndërsa në 20% të listës kryesia do të ketë të drejtë të përfshijë edhe emra të tjerë, për të siguruar përfaqësimin e të gjitha grupeve të interesit.
Lista finale e kandidatëve për deputetë pritet të zyrtarizohet në janar./Re.D/Fjala.al
