Majlinda Kelmendi ka nxjerrë në shitje medaljen e saj të fituar në Olimpiadën e “Rio 2016” në Brazil dhe të gjitha paratë e fituara do të shkojnë për blerjen e materialeve mjekësore dhe medikamenteve për fëmijët e prekur me tumor në Kosovë.
Kampioni e botës në xhudo është një nga figurat më të njohura të sportit në Kosovë, por edhe një nga njerëzit më frymëzues për të rinjtë dhe jo vetëm. Së fundmi ajo ka vendosur të bëjë një gjest të madh për të ndihmuar fëmijët kosovarë të sëmurë.
“Unë kam dëshirë që secili fëmijë të ketë shansin e tij në jetë. Për këtë arsye unë kam vendosur të nxjerr në shitje Medaljen e Artë që kam fituar në Lojërat Olimpike të Rios në Brazil. Shitja e saj do të sjellë të ardhura të mjaftueshme për ilaçe, të cilat do t’i vijnë në ndihmë fëmijëve kosovarë që janë të sëmurë me tumor.
Ju ftoj të gjithëve që të bëheni si unë dhe të dhuroni sadopak për organizatën ‘Care for Kosova Kids’, në mënyrë që të gjithë të kenë një shans në këtë jetë. Shuma që ju do të dhuroni do të dyfishohet nga Banka Europiane për Zhvillim dhe Rindërtim. Fëmijët kosovarë do të shërohen falë ndihmës tuaj”, shprehet Kelmendi.
Majlinda Kelmendi shkroi historinë duke marrë Medaljen e Artë në Lojërat Olimpike Rio 2016 në xhudo për kategorinë deri në 52 kilogramë. Për Shqipërinë dhe Kosovën kjo është një medalje historike, si e para olimpike.
Pa.Va/Fjala.al
