Ka qenë një pritje që ka zgjatur pafund, teksa nuk po dukej as “dritë në fund” të tunelit, por më në fund, ka ardhur dhe, pas, një prove gjenerale, të zhvilluar të dielën me ndeshjet e turit të 32-shes së Kupës së Shqipërisë, që përcaktoi 16 skuadrat që vijojnë më tej betejën për trofeun e dytë, futbolli shqiptar ka ngritur zyrtarisht siparin e sezonit të ri me takimet e javës së parë të të 3 niveleve të Kampionatit Kombëtar.
Dhe natyrisht vëmendje ka qenë tek 5 duelet e nivelit më të lartë, Kategorisë Superiore, aty ku sytë ishin përqendruar tek përballja midis kampiones dhe nënkampiones së sezonit të shkuar, Tirana i ka dhënë leksion pragmatizmi Kukësit, duke fituar 2-0 dhe “shfryrë” egon e rivalëve verilindorë. Ka qenë një nisje fantastike kjo e së mërkurës për kampionët në fuqi të Kategorisë Superiore.
Edhe pse me 6 mungesa në formacion, Tirana arriti t’i mposhtnin verilindorët e trajnerit Skënder Gega, të cilët janë, të paktën në letër, një ndër skuadrat më të forta të kampionatit. Ndërkaq, Kastrioti ka befasuar Partizanin në “uverturën” e këtij sezoni të Kategorisë Superiore, duke e mundur kampionen e para dy sezoneve në Stadiumin e Kamzës me rezultatin 2-1.
Krutanët treguan grinte dhe në minutën e 20-të shënuan me anë të brazilianit David. Një 11-metërsh në pjesën e dytë i barazoi shifrat, pasi Asani u tregua i saktë nga pika e bardhë. Por, në fund ishte Rezi që me një gol mjaft të bukur i dha goditjen finale skuadrës së Ilir Dajës dhe kështu Kastrioti e nis kampionatin me tre pikë. Ndërkaq, në Ballsh, vendasit e Bylisit kërkuan me ngulm të triumfonin kundër Laçit.
Por skuadra vendase, e drejtuar nga trajneri serb, Dovedan, shënoi madje e para me Hadrojin, por në fillim të pjesës së dytë kurbinasit barazuan me Nuabuezen me 11-metërsh. Bylisi ngulmoi të shënonte golin e fitores, por pa sukses dhe gjithçka u mbyll në barazim 1-1 në “Adush Muça” e të dyja skuadrat ndanë nga një pikë. Ashtu sikundër bënë në përballjen e mbrëmjes edhe Teuta me Skënderbeun.
Kështu, nuk pati fitues në “Niko Dovana, teska Teuta e Edi Martinit ngeci në një barazim 1-1 me Skënderbeun e Julian Ahmatajt, që zhvilloi një takim të mirë dhe e meritoi pikën. Rubin Hebaj gjeti rrugën e rrjetës që në minutën e 10-të, duke u ndihmuar edhe nga një devijim i Mensah. Por Skënderbeu riktheu baraspeshën në minutën e 34-t, kur portieri Frashëri gabon në dalje, përplaset me një mbrojtës të ekipit të tij.
Përfiton aty Jorgo Meksi, i cili goditi saktë me një parabolë, duke i dhuruar një pikë shumë të rëndësishme ekipit korçar me golin e tij. Ndërkaq, në takimin tjetër të mbrëmjes, Vllaznia e nisi sezonin e ri në Kategorinë Superiore duke mundur me rezultatin e pastër 2-0 Apoloninë. Shkodranët e drejtuar nga trajneri Tomas Brdariç e mbizotëruan plotësisht sfidën në “Loro Boriçi” duke treguar vendosmëri në fushë.
Të dy golat erdhën në pjesën e dytë, por kuqeblutë mund ta kishin zhbllokuar sfidën në pjesën e parë pasi shpërdoruan disa raste. Megjithatë, 45 minutat e para u mbyllën me rrjeta të paprekura. Boshnjaku Haris Dilaver zhbllokoi takimin në minutën e 53-të, ndërsa ish-futbollisti i Tiranës dhe Luftëtarit, Ismael Dunga, realizoi gol sapo u fut në fushë, 8 minuta para fundit të kohës së rregullt.
Pa.Va/Fjala.al
