Ditën e mërkurë ikona e futbollit Diego Maradona u nda nga jeta.
Ai la pas një karrierë legjendare dhe tejet të suksesshme në futboll, Maradona u shua nga kjo jetë duke u kujtuar nga figura të shumta publike.
Një ndër ta është edhe kuzhinieri turk me famë botërore, Nusret Gokce, i cili ka pasur rastin të gatuajë disa herë për argjentinasin.
Në nderim të tij, Nusret, ka rezervuar si të veçantë një nga tavolinat e tij në restorantin e tij në Dubai, për të kujtuar përjetësisht futbollistin legjendar.
Ai ka publikuar një video të tavolinës së preferuar të Maradonës, mbi të cilën tashmë ka vendosur portretin e tij përkujtimor dhe një pllakatë ku shkruhet “e rezervuar”.
“Kjo ishte tavolina jote e preferuar Maradona. Tavolina është rezervuar gjithmonë për ty. U prehsh në paqe legjendë”, ka shkruar Nusret Gokce në Instagram.
Legjenda e futbollit botëror, Diego Armando Maradona ndërroi jetë të mërkurën në moshën 60-vjeçare.
Maradona ishte në periudhë rehabilitimi prej afro dy javësh pasi kishte kryer një ndërhyrje kirurgjikale për të hequr një mpiksje gjaku në tru, pasi ishte rrëzuar.
Ndërsa gjendja e tij ishte në përmirësim, krejt pa pritur ai pësoi atak kardiak.
Maradona njihet si një prej futbollistëve më të mirë të të gjitha kohërave dhe ndihmoi Argjentinën të fitonte Kupën e Botës në 1986.
Ndër ekipet me të cilat ai ka luajtur janë Boca Juniors, Napoli dhe Barcelona duke u kthyer në idhullin e miliona tifozëve për shkak të aftësive të tij të jashtëzakonshme.
Maradona do të mbahet mend gjatë dhe për të famshmen “Dora e Zotit”, e cila e nxori jashtë loje Anglinë nga botërori i 1986./Re.D/Fjala.al
