Revista prestigjioze “zëvendëson” “Topin e Artë” me “11-shen më të mirë të të gjitha kohërave. Revista prestigjioze “France Football” ka bërë të ditur të hënën “Skuadrën e Ëndrrave” të “Topit të Artë”, që përfshin 11 lojtarët më të spikatur të këtij gjysmëshekulli të fundit. Duke qenë se dhënia e “Topit të Artë” këtë vit është anuluar për shkak të epidemisë së virusit korona, që ka shpërthyer në shkallë globale, revista e përjavshme që e ka krijuar këtë çmim, zgjodhi që ta zëvendësojë atë me një “11-she” më të mirë të të gjitha kohërave.
Gazetarë nga 170 vende të botës, bashkëpunëtorë të revistës prestigjioze, kanë votuar për kandidatët e tyre për skuadrën ideale me skemën 3-4-3. Në portë, si nr. 1 më i madh i të gjitha kohëra mbetet Lev Jashinin, i cili e fitoi “Topin e Artë” më 1963-shin dhe mbetet i vetmi portier që e ka fituar atë. Përpara tij rreshtohet një mbrojtje 3-she, e përbërë nga Franc Bekenbaueri, Kafuja dhe Paolo Maldini. Bekenbaueri është i vetmi mbrojtës që e ka fituar dy herë “Topin e Artë”, ndërsa braziliani dhe italiani nuk e kanë fituar këtë çmim, por mbeten padyshim si më të mirët në pozicionin e tyre.
Në mesfushë, revista prestigjioze ka rreshtuar një 4-she po aq mbresëlënëse, të përbërë nga Ksavi, Lotar Mateusi, Peleja i ndjeri Diego Maradona. Ksavi nuk e ka fituar asnjëherë “Topin e Artë”, ndërsa gjermani e ka fituar atë një herë, më 1990-ën, ndërsa Peleja dhe Maradona, janë diskutuar vazhdimisht si kandidatët kryesorë për lojtarin më të madh të të gjitha kohërave, pasi braziliani është shpallur 3 herë “kampion i botës”, ndërsa argjentinasi e udhëhoqi i vetëm Argjentinën drejt këtij titulli më 1986-ën.
Ndërkaq, sulmin 3-sh e përbëjnë Lionel Mesi, Kristiano Ronaldo dhe Ronaldo Nazario. Argjentinasi e ka fituar 6 herë “Topin e Artë”, portugezi 5, ndërsa braziliani e ka fituar dy herë këtë çmim prestigjioz. Në fakt, revista prestigjioze ka bërë ditur edhe një 11-she të dytë, të përzgjedhur nga juria e saj dhe një 11-she të 3-të, të atyre që mund të kishin qenë në një formacion ideal.
Skuadra e Ëndrrave e “FRANCE FOOTBALL”
Portier: Lev Yashin
Mbrojtës: Kafu, Franc Bekenbauer, Paolo Maldini
Mesfushorë: Ksavi, Lotar Mateus, Diego Armando Maradona, Pele
Sulmues: Lionel Mesi, Ronaldo Nazario dhe Kristiano Ronaldo.
Pa.Va/Fjala.al
