Rikthehet pas 8 vitesh, 65-vjeçari u prezantua të martën pasdite para skuadrës durrsake. Ndërkohë që Kategoria Superiore i drejtohet javës së 9-të, që është edhe java e fundit e fazës së parë dhe skuadrat i kanë hedhur sytë drejt merkatos së janarit, është Teuta që ka bërë të martën një lëvizje në këtë drejtim, por duke marrë një drejtor të ri teknik.
Klubi durrsak, që këtë sezon ka objektiva madhorë dhe pretendon titullin “kampion”, ka prezantuar Sulejman Starovën si drejtorin e ri teknik. Starova është një emër i njohur i futbollit shqiptar dhe ky është një rikthim pasa 8 vitesh në Durrës për 65-vjeçarin që ka provuar të drejtojë bregdetarët më parë si trajner. Teuta ka vijuar me përgatitjet për sfidën e fundjavës në kampionat ndaj Apolonisë, në ndeshjen që do të luhet në Stadiumin “Loni Papuçiu” kundër ekipit vendas.
Emërimin e tij e ka bërë të ditur klubi durrsak, në një njoftim të postuar në rrjetet sociale. “Skuadra e Teutës ka filluar ditën stërvitjen dhe përpara ekipit është prezantuar nga shefi i klubit, Enid Furxhi, drejtori teknik Sulejman Starova, – thuhet në njoftimin e klubit bregdetar. – 65-vjeçari nga Tirana nga sot ka marrë detyrën e re me Teutën dhe menjëherë pas zyrtarizimit ka filluar nga puna.”
“Starova është një emër i njohur ne kampin blu, teksa ka qenë gjithashtu në periudha të ndryshme në drejtimin e bluve si trajner”, – përfundon postimi i klubit të Teutës në rrjetet sociale. Pas 8 javësh, Teuta ndan vendin e 5-të dhe të 6-të me Kastriotin, me nga 10 pikë secila, por duhet theksuar se, ndonëse është ekipi i vetëm që nuk ka pësuar ende humbje këtë sezon, ka korrur vetëm një fitore dhe ka marrë plot 7 barazime.
Pa.Va/Fjala.al
