Kryebashkiakja e Shkodrës, Voltana Ademi ka pranuar presionin e vazhdueshëm politik që po ndjen në mandatin e dytë si qytetarja e parë e qytetin verior.
Në një intervistë për ‘Fol me mua’ në “Fax News”, Ademi shtoi se vendi po kalon një situatë të vështirë dhe se qytetarëve nuk u është dhënë mundësia për të bërë zgjedhjen e duhur.
Sipas saj çdo bashki duhet të vetëqeveriset duke menaxhuar siç duhet paratë publike vendore.
”Unë nuk e kam dashur që të ishte kështu. Unë mendoj që edhe situata që kalojmë është e rëndë, është e rëndë edhe për mua. Unë ndjehem në një presion të vazhdueshëm. Ne jemi dy vite pas mandatit dhe për mua nuk është mirë sigurisht presioni politik. Po pse duhet të ndodhte kështu? Ne mund ta menaxhonim të gjithë ne, por nuk ia dhamë mundësinë popullit që ta bënte këtë të mundur. Kemi shumë kohë në fakt që nuk ia japim mundësinë qytetarëve për ta bërë zgjedhjen siç duhet. Ne punojmë atje, ne punojmë për ditë, ne shërbejmë për ditë sikur të mos kishte ndodhur asgjë.
“Është sfiduese se ne jemi sot këtu po nuk e dimë si do të jetë nesër si është projeksioni dhe kur qeveris, kur administron duhet të mendosh se nuk mendon për sot, ajo çfarë ndodh sot është menduar shumë kohë më përpara dhe duhet të projektojmë. Kemi një vështirësi në këtë aspekt, por po mundohemi ta administrojmë. Ne vetëadministrojmë në Shkodër.
“Unë mendoj që kjo vështirësia që kemi kaluar këto vite ka treguar në Shkodër, pavarësisht vështirësive ne kemi punuar më mirë, kemi menaxhuar paratë publike vendore më mirë, kemi ndërtuar më shumë dhe më mirë me aq para sa kemi pasur po ta krahasosh me gjithë periudhat më përpara. Ne jemi bashkia pa borxhe duke e vetëqeverisur. Duhet të rritet në koshiencën e gjithsecilës bashki gjithsecilit komunitet që ne duhet të vetëqeverisim dhe në aspektin e asaj çfarë kemi bërë ne jemi përpjekur që ta ndërtojmë ta vetëbëjmë, ta bëjmë vetë dhe këtë vazhdojmë të bëjmë”- tha Ademi.
