Pasi e ka mundur në fushën e vet, e mund edhe në Shkodër 2-1, rihapet beteja e kreut.
Kategoria Superiore e Kampionatit Kombëtar të Futbollit ka nisur javën e saj të 18-të me takimin midis Vllaznisë dhe Laçit. Ndeshja të u luajt në Stadiumin “Loro Boriçi” të Shkodrës u mbyll me rezultatin 2-1 në favor të kurbinasve.
Takimi Vllaznia-Laçi ka ngritur të premten siparin e javës së 18-të të Kategorisë Superiore, që është në fakt edhe java e fundit e gjysmës së parë të këtij sezoni të nivelit më të lartë të Kampionatit Kombëtar të Futbollit.
Ndeshja e zhvilluar në Stadiumin “Loro Boriçi” të Shkodrës ka parë një pjesë të parë të luftuar fort nga të dyja skuadrat, me Vllazninë që e mbizotëron fushën sa i përket vëllimit të lojës, por kurbinasit mbrohen ngjeshur dhe për këtë arsye, rastet e ndërtuara për shënim kanë qenë fare të pakta dhe pa rrezikshmëri të lartë. Për t’u shënuar është një gabim i portierit shkodran të Laçit, Alen Sherrit, i cili për pak sa nuk ia dhuron topin kundërshtarit. Vllaznia do të marrë një goditje në minutën e 23-të, kur Herald Marku do të dëmtohet dhe do të zëvendësohet nga i sapoardhuri Kaleziç.
Me kalimin e minutave, skuadra mike do ta hedhë gjithnjë e më tepër drejt portës kundërshtare, por pjesa e parë do të mbyllet me rrjeta të paprekura. Ndonëse ajo e dyta nis më mirë për laçjanët, që godasin dy herë, por pa rezultat, me anë të Xhixhës, është Vllaznia ka një rast të mirë në minutën e 54-të, por goditja e lirë në pozicion të favorshëm në kufijtë e zonës e Imerit gjen murin. Megjithatë, ndeshja zhbllokohet në fundin e minutës së 58-të, Shehu i rëmben një top Kaleziçit dhe shërben për Nuabuezen, i cili nuk fal, duke mposhtur Zogoviçin, dhe kalon në epërsi kurbinasit.
Por Vllaznia nuk jepet dhe reagon dhe vetëm 7 minuta më pas barazon shifrat, kur goditja e Krujës gjen shtyllën e djathtë pingule të portës laçiane, por topi i kthyer përfundon në këmbët e Imerit, që nuk e ka të vështirë të shënojë me portën e boshatisur. Por një tjetër çoroditje në mbrojtje e Vllaznisë, i jep mundësi Laçit të gjejë sërish golin 6 minuta më pas, me Harmon që fiton duelin me Adilin dhe mposht Zogoviçin. 13 minuta para fundit Laçi do të mbetet me 10 lojtarë, teksa Obanor do të ndëshkohet me karton të kuq për ndërhyrje të ashpër, ndërsa ka edhe tension midis skuadrave.
Pavarësisht inferioritetit numerik, Laçi do të mbahet dhe do të fitojë kështu me shifrat 2-1, duke u konfirmuar si macja e zezë e Vllaznisë, teksa e ka mundur në të dy takimet e këtyre dy fazave të para të kampionatit.
