Sevilja-Barcelona, të mërkurën (21.00) dhe Levante-Atletik Bilbao, të enjten (21.00), direkt në RTSH Sport. Kupa e Spanjës, e njohur ndryshe edhe si Kupa e Mbretit, do të luajë në mesjavë aktin e parë të gjysmëfinaleve, që ndryshe nga turet e deritanishme, që janë vendosur nga një takim i vetëm, do të zhvillohet me sistem vajtje-ardhje. Siç dihet, kjo veprimtari historike, që po zhvillon edicionin e saj të 118-të, është një tjetër ekskluzivitet madhor i Rrjetit të Radio-Televizionit Shqiptar, që po sjell përballjet më të spikatura të çdo faze.
Shorti gjysmëfinaleve të kësaj veprimtarie, që ka dhuruar dy çifte interesante dhe, në duelin e parë, Sevilja, 5 herë fituese dhe 4 herë finaliste e mundur do të përballet me Barcelonën, e cila është në fakt rekordmbajtësja e këtij trofeu, duke e fituar atë plot 30 herë dhe duke dështuar në 11 finale të tjera. Sevilja erdhi në gjysmëfinale pasi mundi me një gol të vetëm në pjesën e dytë skuadrën e vetme që kishte mbetur nga niveli i dytë i futbollit spanjoll, Almerian.
Kurse katalanët e siguruan vendin midis 4 më të mirave të Kupës, pas asaj fitoreje dramatike, 5-3, të siguruar në duelin çerekfinal në fushën e Granadës. Dueli i parë i çiftit, Sevilja-Barcelona, do të luhet të mërkurën, duke nisur nga ora 21:00, ndërsa ai i kthimit më 3 mars 2021. Ndërkaq, në duelin tjetër gjysmëfinal, Levante, e cila zyrtarisht nuk e ka fituar asnjëherë këtë trofe, sfidon një tjetër specialist të Kupës së Spanjës, Atletik të Bilbaos, e cila me 23 trofe të fituara dhe 14 finale të humbura është e dyta, pas Barcelonës, sa i përket sukseseve të arritura në këtë veprimtari.
Në duelin çerekfinal, Levante-Vijareal, skuadra vendase ka fituar me një gol të vetëm të shënuar në skajet e 120 minutave, teksa gjithçka po i drejtohej lotarisë së 11-metërshave. Kurse Atletik i Bilbaos ka triumfuar në duelin çerekfinale ndaj Real Betisit, por vetëm pas lotarisë së 11-metërshave, pasi koha e rregullt dhe ajo shtesë u mbyll në barazim 1-1. Dueli i parë i çiftit, Levante-Atletik i Bilbaos, do të luhet të enjten, duke nisur nga ora 21:00, ndërsa ai i kthimit më 4 mars 2021.
Kupa e Spanjës
Gjysmëfinalet:
Të mërkurën, 10 shkurt 2021:
Sevilja – Barcelona (21:00)
Të enjten, 11 shkurt 2021:
Atletik i Bilbaos – Levante (21:00)
Të mërkurën, 3 mars 2021:
Barcelona – Sevilja (21:00)
Të enjten, 3 mars 2021:
Levante – Atletik i Bilbaos (21:00)
