Lojtari i Kombëtares kuqezi drejt kurorëzimit të një sezoni mbresëlënës në rrjetën helvete. Volejbollisti i Kombëtares, Redi Koçi, ka arritur një tjetër kulm të karrierës së tij, pasi ka siguruar vendin në finalen e Kupës së Zvicrës, ndërsa skuadra e tij është në rrugë të mbarë edhe në fazën e “play-off”-it në kampionatin helvet të rrjetës.
Koçi, i cili luan prej 5 vjetësh jashtë Shqipërisë, duke e provuar veten me sukses në parketin evropian, në një udhëtim që e ka çuar atë nga Finlanda në Oman e më pas në Republikën Çeke dhe në Rumani, tanimë është pjesë e skuadrës së Shënenverdit në nivelin më të lartë të Kampionatit Zviceran të Volejbollit për Meshkuj, që njihet si NLA.
Dhe skuadra e lojtarit 2 m e 3 cm të lartë, që po bën një sezon të mirë, ka siguruar vendin në finalen e veprimtarisë së dytë të rrjetës helvete, Kupës së Zvicrës, pasi ka triumfuar në 3 sete ndaj Lozanës në duelin gjysmëfinal. Koçi, i cili ka dalë nga radhët e skuadrës së Farka Volejit, ka shënuar 14 pikë në këtë ndeshje.
Dhe ekipi i tij, Shënenverdi, do të përballet në finalen e madhe të 27 marsit me skuadrën e TSV Jonas. Në një përkim interesant, edhe formula e “play-off”-it të Kampionatit Zviceran e ka vënë skuadrën e volejbollistit shqiptar, që e mbylli sezonin e rregullt në vendin e 3-të në kampionat, pikërisht përballë së njëjtës skuadër.
Dhe në duelin e parë, nga 3 të mundshme, Shënenverdi e mundi TSV Jonan 3-1 në fazën çerekfinale, duke hedhur kështu edhe një hap drejt vendit në gjysmëfinalen e betejës për titullin “kampion”.
