Qytetarët e Shkupit kanë zhvilluar paraditen e sotme një protestë masive, kundër vendimit të Gjylatës Penale për rastin “Monstra”. Nën moton “Drejtësi dhe Liri”, protestuesit u grumbulluan në Çair, duke vazhduar rrugën drejt Gjykatës dhe më pas edhe para Qeverisë.
Sipas mediave atje, protestës për rastin “Monstra” iu bashkuan edhe familjarët e Almir Aliut, vogëlushit nga Kumanova, për rastin e të cilit të hënën në Kumanovë protestuan dhe kërkuan rigjykim të rastit, dëmshpërblim si dhe lirimin nga akuza të tre familjarëve të Almirit.
Policia ka blinduar qendrën e qytetit duke mos iu hapur rrugën protestusve, ndërsa organizatori i protestës Bedri Ajdari, iu drejtua policëve, duke u bërë thirrje për hapje të rrugës, si dhe duke iu ofruar edhe dokumentin me të cilin kanë paralajmëruar protestën e sotme. Nga ana tjetër, ai u bëri thirrje edhe protestuesve për qetësi dhe durim që të mos tejakalohej situata.
Kujtojmë se për rastin “Monstra” Alil Demiri, Afrim dhe Agim Ismailoviç u dënuan me burgim të përjetshëm, për vrasjen e pesëfishtë në Smillkovë.
