Në përpjekje për të vënë nën kontroll përhapjen e COVID-19, qeveria e Kosovës miratoi të hënën masa të reja kufizuese. Në masat e reja parashikohet hyrja në fuqi e një ndalim qarkullimi të qytetarëve nga ora 22:00 deri në 05:00 të mëngjesit, përveç rasteve urgjente.
Në masat e reja parashikohet mbyllja e restoranteve nga data 7 deri me 18 prill, ndërkohë që lejohet të funksionojë shërbimi “merr me vete”, “dërgesë me porosi” apo marrjes së porosive pa u larguar nga makinat.
Sipas vendimit të Qeverisë së Kosovës, ndalohet veprimtaria e qendrave të mbyllura tregtare, përveç shërbimeve thelbësore, siç janë dyqanet ushqimore dhe farmacitë, nga data 7 prill deri më datë 18 prill.
Në qendrat e hapura tregtare lejohet aktiviteti duke i respektuar masat dhe rekomandimet për kontrollin, parandalimin dhe luftimin e pandemisë COVID – 19.
Sipas vendimit të Qeverisë së Kosovës, të gjitha institucionet publike dhe private të arsimit parauniversitar nga data 12 deri me 18 prill dhe të gjitha institucionet publike dhe private universitare nga data 7 prill deri me datë 18 prill do të zhvillojnë mësim online.
Me masat e reja ndalohen të gjitha grumbullimet me rrezikshmëri të lartë të shpërndarjes së infeksionit, me më shumë se 10 persona.
