Jurgen Goxha ka kaluar sezonin e fundit në radhët e klubit të Gabala në Azerbajxhan, një hap cilësor në krahasim me futbollin shqiptar. Mbrojtësi mendon se me këtë lëvizje, ai duhej të kishte marrë një ftesë nga përfaqësuesja shqiptare, teksa nuk ka fshehur zhgënjimin e tij me një akuzë gjatë “Sport Magazine”.
“Nuk na llogarisin, ne jemi çuna të lëvizshëm. Kërkojnë çunat e babit të Kombëtarja. Çunat e babit që kanë lidhjet e veta. Ne s’kemi lidhje.
A e meritoj të luaj në ekip kombëtar? Normalisht që nuk e meritoj, pasi ka lojtarë si Gjimshiti, Kumbulla, Ismajli… Por të paktën të jem edhe unë aty. Kush nuk i do shanset e veta”, tha Goxha i cili është i bindur se ka bërë një hap para në karrierë.
“Pa ofenduar kampionatin shqiptar, është nivel pak më i lartë dhe ka lojtarë shumë cilësorë, ka lojtarë që mund të luajnë në nivele shumë më të larta. Lojtari i fundit që ka ardhur ka qenë Keisuke Honda, ka luajtur me Milanin. Për dy muaj flitet se ka marrë 300 mijë euro atje“, shpjegoi mbrojtësi i cili në të kaluarën ka luajtur në Superiore me Tiranën e Bylisin.
