Shkollat në të gjithë Evropën duhet të qëndrojnë të hapura dhe të merren të gjitha masat për stafin dhe fëmijët, sipas një deklaratë të përbashkët të Organizatës Botërore të Shëndetësisë (OBSH) dhe UNICEF.
“Pandemia ka shkaktuar ndërprerjen më katastrofike të arsimit në histori. Është jetike që të vazhdojë mësimi në klasa pa ndërprerje” tha Hans Kluge, drejtori i OBSH për Evropën.
Kluge tha se ndërsa pandemia është ende midis nesh, “arsimimi i fëmijëve në mënyrë të sigurt duke qenë të pranishëm në shkolla është parësor për shëndetin mendor dhe aftësitë shoqërore dhe duhet të jetë një objektiv parësor për qeveritë”.
“Pandemia nuk ka përfunduar. Ne të gjithë kemi një rol për të siguruar që shkollat të mbeten të hapura në të gjithë Rajonin. Fëmijët dhe të rinjtë nuk mund të rrezikojnë të kenë një vit tjetër të të mësuarit në distancë. Vaksinimi dhe masat mbrojtëse do të ndihmojnë në parandalimin e një rikthimi në ditët më të errëta të pandemisë kur njerëzit duhej të duronin shtetrrethimet dhe fëmijët duhej të përjetonin mësim në distancë” tha Philippe Cori, Zëvendës Drejtor Rajonal, nga UNICEF për Evropën dhe Azinë Qendrore.
44 nga 53 vende në Evropë mbyllën shkollat në shkallë vendi në kulmin e valës së parë të pandemisë në prill 2020, ndërsa shumica u rihapën në shtator.
Të dy organizatat thanë se mësuesit dhe personeli i shkollës duhet të jenë grupet kryesore që duhet të vaksinohen, duke shtuar se të gjithë fëmijët e moshës mbi 12 vjeç me probleme shëndetësore gjithashtu duhet të vaksinohen.
