Shtatë Kongresmenë në SHBA i kanë dërguar letër Presidentit Joe Biden, ku i bëjnë thirrje të ndërhyjë për situatën politike dhe korrupsionin e lartë në Serbi. Sakaq, sipas tyre, kjo mund të ketë ndikim në Ballkanin Perëndimor dhe gjithë Europën, ndaj kërkojnë që të veprohet me ligjin për shpalljen ‘non grata’ të personave që rrezikojnë stabilitetin e rajonit.
“Raportet tregojnë se Vuçiç e ka thelluar korrupsionin në Serbi, duke përdorur krizën e COVID-19 si justifikim për shpenzimet e qeverisë” – thuhet në letrën e dërguar Presidentit të SHBA më 4 tetor.
Kongresmenët nënvizojnë se mediat pranë qeverisë kanë marrëdhënie të ndërsjellë duke i shërbyer pushtetit dhe përfituar financiarisht nga ana tjetër.
“Ne besojmë që SHBA duhet të ndërmarrë veprime për të mbrapsur korrupsionin dhe sulmet ndaj lirisë së medias në Serbi” – thuhet nga kongresmenët.
Në letër përmendet fakti se televizioni i madh privat në Serbi, Pink TV gjatë viteve 2014-2016 ka marrë të paktën 7 milionë euro hua nga qeveria dhe ky televizion e ka favorizuar dukshëm Vuçiç gjatë fushatës zgjedhore.
Kjo situatë, thonë kongresmenët, dëmton normat e demokracisë, u mbyll gojën kritikëve dhe fuqizon personat e korruptuar.
Për zgjedhjet presidenciale dhe parlamentare që Serbia pritet të mbajë në pranverë, ligjvënësit amerikanë i kërkojnë Biden që të sigurohet që procesi të jetë i lirë dhe i ndershëm përfshirë fushatën dhe procesin e votimit.
“Për të pasur një të ardhme më optimiste, ne besojmë se veprime të mëtejshme diplomatike nga SHBA dhe aleatët europian, është vendimtare për të garantuar se Serbia mund të jetë efektive në zbatimin e reformave demokratike. Kjo do të sjellë përmirësim të marrëdhënieve mes shteteve në Ballkanin Perëndimor përfshirë Kosovën” – shprehen kongresmenët.
