Sekretari i përgjithshëm Gazment Bardhi i bëri thirrje Sali Berishës që nëse i ka siguruar realisht firmat e 4200 delegatëve të Kuvendit Kombëtar të PD-së t’i depozitojë në protokollin e selisë blu dhe jo nga dera e pasme në zyrën e Edi Palokës. Numri dy i PD-së e cilësoi edhe njëherë veprimin e ish-kryeministrit, tallje dhe show, që duhet t’i japë fund.
“Për fat të keq dhe dua të shpreh keqardhjen time, tallja me anëtarët e PD-së vijon edhe sot. PD është institucion, respekti është primar, ne nuk veprojmë në ilegalitet, nuk kemi halle për zbatimin e ligjit dhe në funksionimin tonë kemi përgjegjësinë dhe detyrimin për të zbatuar rregullat e brendshme të PD-së, statutin. Dua të konfirmoj se në PD nuk ka ardhur asnjë kërkesë për mbledhjen e Kuvendit Kombëtar.
Ajo që shqiptarët dhe veçanërisht mbështetësit e PD-së kanë parë ka qenë një bllok i madh, tallje me mundin e demokratëve për halle dhe probleme personale sepse nuk u arrit që të siguroheshin ¼ e firmave të anëtarëve për nisjen e procedurës për thirrjen e Kuvendit. Nëse i kanë firmat ti depozitojnë në protokollin e PD-së, çdo institucion ka përgjegjësinë për të respektuar vullnetin e demokratëve.
Zyra nuk është e kryetarit të këshillit kombëtar, Edi Paloka e disponon si ish-nën/kryetar dhe nuk e ka dorëzuar akoma. Pozicioni i kryetarit të këshillit kombëtar është honorifik. Tani na thuhet të hyjmë te kasaforta e zotit Paloka për t’i parë janë apo nuk janë firmat. Madje sot na u tha vetë-verifikojini. Me kë tallen këta?”, tha ai.
Prej mbrëmjes së djeshme mes Lulzim Bashës dhe Sali Berishës ka nisur debati për procedurën e dorëzimit të firmave, të cilat ish-kryeministri Sali Berisha u shpreh se janë 4200 dhe ja dorëzoi kryetarit të Këshillit Kombëtar të PD-së, Edi Paloka.
Ish-deputeti i Partisë Demokratike, Gent Strazimiri deklaroi sot se firmat e mbledhura nga “Foltorja” e Sali Berishës do të verifikohen në datë 11 dhjetor përmes një komisioni të ngritur nga vetë Kuvendi. Ai u shpreh se firmat janë dërguar në zyrën e kryetarit të Këshillit Kombëtar Edi Paloka dhe kushdo që ka kuriozitet t’i shohë ato, mund ta bëjë, por verifikimin sipas tij mund ta bëjë vetëm Kuvendi.
