Ëndrrat për një jetë më të mirë patën një fund tragjik për 14 emigrantë të paligjshëm në Greqi. Mediat në vend raportojnë se një trafikant nga Moldavia po i transportonte me një automjet Citroen C5 në momentin që ndodhi aksidenti pasi po ndiqej nga oficerët e policisë.
Ngjarja e rëndë ndodhi në autostradën e Egnatias. Shoferi që po udhëtonte nga Komotini në Xanthi pak pas mesnate, tentoi që t’i arratisej policisë dhe nuk iu bind sinjalit të oficerëve për kontroll duke shtuar shpejtësinë.
Patrulla vijoi që ta ndiqte por në një momenti ai e mori kthesën me shpejtësi të lartë dhe për pasojë humbi kontrollin e mjetit. Pas përplasjes raportohet se automjeti u dëmtua rëndë dhe për pasojë shtatë prej pasagjerëve humbën jetën.
Të lënduarit janë dërguar në spitalin e Komotini-t në gjendje të rëndë për jetën. Kurse, dy të tjerë që kanë marrë lëndime të lehta janë dërguar në spitalin e Xanthi-t. Ndërkohë autoritetet kanë nisur një hetim për rrethanat e ngjarjes që u kthye në një tragjedi. Po ashtu po hetohet për identifikimin e viktimave, shtetësia e të cilëve nuk dihet ende.
