Ish-presidenti Donald Trump ka thënë se megjithëse ai mendon se presidenti kinez Xi Jinping është “një vrasës” që “shkatërroi botën” me Covid-19, ai kishte një “marrëdhënie të shkëlqyer” me të.
Në një intervistë me Maria Bartiromo të Fox News, Trump tha se “sapo u shfaq Covid, ose virusi kinez siç e quaj unë “, marrëdhënia e tij “e shkëlqyer” me Xi u prish.
Marrëdhënia e Trump me Xi rrallëherë u përshkrua si “e shkëlqyer”. Edhe para shpërthimit të pandemisë Covid-19, Trump shtyu një qëndrim të ashpër ndaj Kinës, duke e mbyllur SHBA-në në një luftë tregtare me Pekinin dhe duke e përshkruar Kinën si një “armik”.
Sidoqoftë, marrëdhënia u përkeqësua dhe pas shpërthimit të Covid-19. Trump që në fillim këmbënguli që virusi doli nga një laborator në Wuhan.
“Ata me të vërtetë kanë shkatërruar të gjithë botën,” tha Trump, përpara se të ‘godiste’ Presidentin Joe Biden për dështimin në përmbushjen e premtimit të tij të fushatës dhe “fundin” e Covid-19.
I pyetur pse Biden nuk i ka bërë presion Xi për origjinën e koronavirusit gjatë disa bisedave këtë vit, Trump u përgjigj “ai ka frikë prej tij”.
