Organizata Botërore e Shëndetësisë lëshoi alarmin se varianti Omicron i koronavirusit po përhapet më shpejt se varianti Delta dhe po shkakton infeksione në masë tek njerëzit tashmë të vaksinuar, ose që janë shëruar nga sëmundja COVID-19.
Varianti po shmang me sukses disa përgjigje imune, thotë OBSH, që do të thotë se programet përforcuese që po zbatohen në shumë vende duhet të synohen drejt njerëzve me sistem imunitar më të dobët.
“Tani ka prova të qëndrueshme që Omicron po përhapet dukshëm më shpejt se varianti Delta”, tha në një konferencë për shtyp drejtori i përgjithshëm i OBSH-së, Tedros Adhanom.
“Ka më shumë gjasa që njerëzit e vaksinuar, ose të rikuperuar nga COVID-19 të infektohen, ose të riinfektohen”, tha Tedros.
Komentet e OBSH i bënë jehonë gjetjes së studimit nga Imperial College London, i cili tha se javën e kaluar rreziku i riinfektimit ishte më shumë se pesë herë më i lartë dhe virusi nuk ka treguar asnjë shenjë se është më i butë se Delta.
Zyrtarët e OBSH-së thanë megjithatë se format e tjera të vaksinimit të imunitetit mund të parandalojnë infeksionin dhe simptomat e rënda të Omicron.
Ka pasur shpresë se qelizat T, shtylla e dytë e një përgjigjeje imune mund të parandalojnë sëmundje të rënda duke sulmuar qelizat e infektuara njerëzore. Eksperti i OBSH-së Abdi Mahamud shtoi: “Megjithëse ne po shohim një reduktim të antitrupave neutralizues, pothuajse të gjitha analizat paraprake tregojnë se imuniteti i ndërmjetësuar nga qelizat T mbetet i paprekur, kjo është ajo që na duhet”.
