esë persona me shtetësi shqiptare, dy gra dhe tre burra, kanë rënë në prangat e policisë italiane në Pordenone pasi akuzohen për një sërë vjedhjesh në dyqanet luksoze të veshjeve në të gjithë Italinë. Sipas mediave vendase, bëhet me dije se banda shkonte çdo herë nga Shqipëria, merrte makina me qira dhe kryente një sërë vjedhjesh me të njëjtën teknikë të përdorur disa herë dhe më pas ktheheshin në atdhe.
Arrestimet dhe ndalimet u vërtetuan nga gjyqtari hetues pranë Gjykatës së Pordenones. Po ashtu u sekuestruan mallra me vlerë rreth 8 mijë euro, të ardhura nga vjedhjet e kryera. Hetimet nisën shtatorin e kaluar pas denoncimit të avokatit të H&M për një sërë vjedhjesh veshjesh në dyqanin në Gran Fiume, në provincën e Pordenones. Vetëm në muajt shtator deri në dhjetor në Friuli Venezia Giulia dhe Veneto, banda dyshohet se ka kryer të paktën 14 vjedhje.
Skema e vjedhjes ishte e tillë: Dy gratë hynin në dyqane dhe i fshihnin rrobat mes rafteve, ku më pas gjendeshin nga dy burra. I treti qëndronte jashtë dhe vëzhgonte ambientin. Banda e shqiptarëve ka kryer disa vjedhje gjatë një dite. Pas arrestimit, ata janë dërguar në në burgjet e Padovës, Veronës dhe Venecias.
