Nga Qeveria deklarojnë se nuk ka asnjë lidhje mes qëndresës së Skënderbeut ndaj Perëndorisë Osmane dhe Turqisë së sotme dhe i cilësojnë si “të pakujdesshme dhe provokuese” pyetjet që kërkojnë të gjejnë simbolikë mes vizitës së Erdogan në Shqipëri dhe përvjetorit të vdekjes së Heroit tonë Kombëtar.
“….(pyetje) Në rastin më të mirë, të pakujdesshme dhe në rastin më të keq provokuese, sepse nuk ka asnjë lidhje mes Republikës së Turqisë dhe rrethimeve të Krujës, apo mes qëndresës së Heroit tonë Kombëtar Skënderbeut dhe Turqisë së sotme, e cila është anëtare e NATO-s, vend partner strategjik i Shqipërisë dhe mik i mirë në ditë të vështira, siç e tregoi edhe mbështetja e paçmuar për rimëkëmbjen pas tragjedisë së tërmetit.
Prandaj problem në këtë rast nuk përbën vizita e Presidentit të Republikës së Turqisë, po lidhje të tilla krejt pa lidhje, të cilat pa dashje nxisin urrejtje mes popujve”, tha për Zërin e Amerikës, drejtori i Komunikimeve në Qeveri, Endri Fuga.
Fuga u pyet për koincidencën e vizitës së presidentit turk, në datën e vdekjes së Skënderbeut dhe nëse një koincidencë e tillë përbënte ose jo problem.
Vizita e Erdogan përkoi me 554-vjetorin e vdekjes së Skënderbeut.
