Armando Broja edhe pse nuk arriti të shënonte vetë, la shenjën e tij në kualifikimin e Southamptonit në fazën e 1/8-ave të FA Cup. Ekipi i drejtuar nga Hasenhuttle në fakt, nuk e pati të lehtë për të eliminuar Coventry-n, që u mposht 2-1 vetëm pas 120 minutave lojë.
Skuadra nga Championshipi e mbylli në epërsi pjesën e parë falë golit të Gyokeres, por Southamptoni barazoi në pjesën e dytë me Armstrong. Pikërisht në momentin e kthimit të ekuilibrave në rezultat u hodh në fushë Broja në vend të Walcott. Rezultati nuk ndryshoi në minutat e mbetura të kohës së rregullt, me Brojën që ra në sy me disa shpërthime, por pa mundur të realizojë.
Gjithsesi, në minutën e 106 sulmuesi i Kombëtares Shqiptare asistoi Walker-Peters për golin e dytë të Saouthamptonit, që i dha kualifikimin në fazën e 1/8-ave.
