Kryeministri Edi Rama që prej ditës së djeshme ndodhet në Viterbo të Italisë. Qëllimi i kësaj vizite është bashkëpunimi mes dy vendeve në fushën e arsimit.
Gjatë fjalës së tij kryeministri Rama ka theksuar se në të ardhme duhet të krijojmë bashkëpunime të reja në sistemin universitar mes dy vendeve. Sipas kryeministrit për shqiptarët Italia është toka e ëndrrave të tyre.
“Duhet të krijojmë sinergji e bashkëpunime të reja në sistemin universitar mes dy vendeve për të ardhmen. Problemet që po përballojmë janë të ngjashme, siç është largimi i të rinjve nga jugu e pjesa qendrore e Italisë, e drejt Veriut e Europës Veriore, E kemi për detyrë ta përballojmë këtë problematikë me racionalitet, pa rënë në kurthin e politikave të së shkuarës. Për ne është e rëndësishme të vazhdojmë të punojmë për internacionalizimin e universiteteve tona, për të bërë që studentët shqiptarë të kenë programe të ngjashme me ato italiane.
Kemi një shembull të mirë universiteti në Shqipëri, si ai i Zonjës së Këshillit të Mirë, themeluar me kërkesë të nënë Terezës, e me mbështetjen e Selisë së Shenjtë. Është një Universitet që dëshmon se mund të lindin sinergji të reja, një katedër italo-shqiptare e plotfuqishme. Na bashkon një lidhje e veçantë.
Për shqiptarët, Italia është toka e ëndrrave të tyre. Na ndan një det, e një histori që jo gjithmonë na ka bashkuar, por në të njëjtën kohë na bashkon një ndjenjë e përbashkët përkatësie e jashtëzakonshme e fqinjësisë. Marrëdhënia mes Shqipërisë e Italisë është e veçantë në të gjitha nivelet. Duhet të shfrytëzojmë më mirë programet europiane, duke përfituar nga njohuria që ka Italia. Kemi shumë për të mësuar e jemi me fat që Italia ka disponueshmërinë vëllazërore për të na ofruar atë që është më e rëndësishme”, tha kryeministri.
